ตโต ปรํ ทนฺตา ยสฺส ปริปุณฺณา, ตสฺส ทฺวตฺตึส. เต สพฺเพปิ วณฺณโต เสตวณฺณาติ ววตฺถเปติ. ยสฺส จ สมสณฺฐิตา โหนฺติ, ตสฺส ขรปตฺตจฺฉินฺน- สํขปฏลมิว สมคนฺถิตเสตกุสุมมกุลมาลา วิย จ ขายนฺติ. ยสฺส วิสมสณฺฐิตา, ตสฺส ชิณฺณอาสนสาลาปีฐกปฏิปาฏิ วิย นานาสณฺฐานาติ สณฺฐานโต ววตฺถเปติ. เตสํ หิ อุภยทนฺตปนฺติปริโยสาเนสุ เหฏฺฐโต อุปริ จ เทฺว เทฺว กตฺวา อฏฺฐ ทนฺตา จตุโกฏิกา จตุมูลิกา อาสนฺทิกสณฺฐานา, เตสํ โอรโต เตเนว กเมน สนฺนิวิฏฺฐา อฏฺฐ ทนฺตา ติโกฏิกา ติมูลิกา สึฆาตกสณฺฐานา. เตสมฺปิ โอรโต เตเนว กเมน เหฏฺฐโต จ อุปริโต จ เอกเมกํ กตฺวา จตฺตาโร ทนฺตา ทฺวิโกฏิกา ทฺวิมูลิกา ยานกูปตฺถมฺภสณฺฐานา. ๑- เตสมฺปิ โอรโต เตเนว กเมน สนฺนิวิฏฺฐา จตฺตาโร ทาฐทนฺตา ๒- เอกโกฏิกา เอกมูลิกา มลฺลิกมกุลสณฺฐานา. ๓- ตโต อุภยทนฺตปนฺติเวมชฺเฌ เหฏฺฐา จตฺตาริ อุปริ จตฺตาริ ๔- กตฺวา อฏฺฐ ทนฺตา เอกโกฏิกา เอกมูลิกา ตุมฺพวีชสณฺฐานา. ทิสโต อุปริมาย ทิสาย ชาตา. โอกาสโต อุปริมา อุปริมหนุกฏฺฐิเก อโธโกฏิกา, เหฏฺฐิมา เหฏฺฐิมหนุกฏฺฐิเก อุทฺธํโกฏิกา หุตฺวา ปติฏฺฐิตาติ.

ตตฺถ ยถา นวกมฺมิกปุริเสน เหฏฺฐา สิลาตเล ปติฏฺฐาปิตา อุปริมตเล ปเวสิตา ถมฺภา น ชานนฺติ "มยํ เหฏฺฐาสิลาตเล ปติฏฺฐาปิตา, อุปริมตเล ปเวสิตา"ติ, นปิ เหฏฺฐาสิลาตลํ ชานาติ "มยิ ถมฺภา ปติฏฺฐิตา"ติ ๕- นปิ อุปริมตลํ ชานาติ "มยิ ถมฺภา ปติฏฺฐา"ติ, ๖- เอวเมว น ทนฺตา ชานนฺติ "มยํ เหฏฺฐาหนุกฏฺฐิเก ปติฏฺฐิตา, อุปริมหนุกฏฺฐิเก ปวิฏฺฐา"ติ, นปิ เหฏฺฐาหนุกฏฺฐิกํ

@๓ ฉ.ม., อิ. มลฺลิกามกุลสณฺฐานา ๔ ฉ.ม., อิ. จตฺตาโร อุปริ จตฺตาโร