สตฺถา อิมํ ธมฺมเทสนํ อาหริตฺวา ชาตกํ ๑- สโมธาเนนฺโต "ตทา ราชา โมคฺคลฺลาโน อโหสิ, นารโท สารีปุตฺโต, กปฺปกนฺเตวาสิโก อานนฺโท, เกสวตาปโส อหเมวาติ วตฺวา "เอวํ มหาราช ปุพฺเพ ปณฺฑิตา มรณนฺติกํ เวทนํ ปตฺวา วิสฺสาสิกฏฺฐานํ อคมํสุ, มม สาวกา ตุมฺหากํ สนฺติเก วิสฺสาสํ น ลภนฺติ มญฺเญติ อาห. ราชา "ภิกฺขุสงฺเฆน สทฺธึ มยา วิสฺสาสํ กาตุํ วฏฺฏติ, กถนฺนุโข กริสฺสามีติ, "สมฺมาสมฺพุทฺธสฺส ญาติธีตรํ เคเห กาตุํ วฏฺฏติ, เอวํ สนฺเต, ทหรา จ สามเณรา จ `สมฺมาสมฺพุทฺธสฺส ญาติ ราชาติ มม สนฺติกํ วิสฺสฏฺฐา นิพทฺธํ อาคมิสฺสนฺตีติ จินฺเตตฺวา "เอกํ เม ธีตรํ เทนฺตูติ สากฺยานํ สนฺติกํ สาสนํ เปเสสิ, "กตรสกฺกสฺส ธีตาติ ปุจฺฉิตฺวา อาคจฺเฉยฺยาถาติ วตฺวา ทูเต อาณาเปสิ. ทูตา