ตทา สตฺถา สากิยานํ เมทฬุปํ นาม นิคมํ นิสฺสาย วิหรติ. ราชา ตตฺถ คนฺตฺวา อารามโต อวิทูเร ขนฺธาวารํ นิวาเสตฺวา มหนฺเตน ปริวาเรน "สตฺถารํ วนฺทิสฺสามีติ วิหารํ คนฺตฺวา ปญฺจ ราชกกุธภณฺฑานิ ทีฆการายนสฺส ทตฺวา เอกโกว คนฺธกุฏึ ปาวิสิ. สพฺพํ ธมฺมเจติยสุตฺตนิยาเมน ๑- เวทิตพฺพํ. ตสฺมึ คนฺธกุฏึ ปวิฏฺเฐ, ทีฆการายโน ตานิ ราชกกุธภณฺฑานิ คเหตฺวา วิฑูฑภํ ราชานํ กตฺวา รญฺโญ เอกํ อสฺสํ เอกญฺจ อุปฏฺฐานการิกํ มาตุคามํ ฐเปตฺวา นิวตฺเตตฺวา สาวตฺถึ อคมาสิ. ราชา สตฺถารา สทฺธึ ปิยกถํ กเถตฺวา นิกฺขนฺโต เสนํ อทิสฺวา ตํ มาตุคามํ ปุจฺฉิตฺวา ตํ ปวตฺตึ สุตฺวา "ภาคิเนยฺยํ อาทาย คนฺตฺวา วิฑูฑภํ คเหสฺสามีติ ราชคหนครํ คจฺฉนฺโต วิกาเล ทฺวาเรสุ ปิทหิเตสุ, นครํ ปตฺวา เอกิสฺสา สาลาย นิปชฺชิตฺวา วาตาตปกิลนฺโต รตฺติภาเค ตตฺเถว กาลมกาสิ. วิภาตาย รตฺติยา, "เทว โกสลนรินฺท อนาโถ ชาโตสีติ วิลปนฺติยา ตสฺสา อิตฺถิยา สทฺทํ สุตฺวา รญฺโญ อาโรเจสุํ. โส มาตุลสฺส มหนฺเตน สกฺกาเรน สรีรกิจฺจํ กาเรสิ.

วิฑูฑโภปิ รชฺชํ ลภิตฺวา ตํ เวรํ สริตฺวา "สพฺเพปิ สากิเย