สมฺมาสมฺพุทฺธสฺส ปน ญาตกา อสตฺตฆาตกา นาม มรนฺตาปิ ปเรสํ ชีวิตํ น โวโรเปนฺติ. เต จินฺตยึสุ "มยํ สิกฺขิตหตฺถา กตุปาสนา มหิสฺสาสา, น โข ปน สกฺกา อมฺเหหิ ปรํ ชีวิตา โวโรเปตุํ, อตฺตโน กมฺมํ ทสฺเสตฺวา ปลาเปสฺสามาติ. เต กตสนฺนาหา นิกฺขมิตฺวา ยุทฺธํ อารภึสุ. เตหิ ขิตฺตา สรา วิฑูฑภสฺส ปุริสานํ อนฺตรนฺตเรน คจฺฉนฺติ, ผลกนฺตรกณฺณจฺฉิทฺทนฺตราทีหิ นิกฺขมนฺติ. วิฑูฑโภ ทิสฺวา "นนุ ภเณ สากิยา `อสตฺตฆาตกมฺหาติ วทนฺติ, อถ จ ปน เม ปุริเส นาเสนฺตีติ. อถ นํ เอโก ปุริโส อาห "กึ สามิ นิวตฺติตฺวา โอโลเกสีติ. "สากิยา เม ปุริเส นาเสนฺตีติ. "ตุมฺหากํ โกจิ ปุริโส มโต นาม นตฺถิ, อิงฺฆ เน คณาเปถาติ. คณาเปนฺโต เอกสฺสปิ ขยํ น ปสฺสิ. โส ตโต นิวตฺติตฺวา "เย เย ภเณ `สากิยมฺหาติ ภณนฺติ สพฺเพ มาเรถ; มาตามหสฺส ปน เม มหานามสกฺกสฺส สนฺติเก ฐิตานํ ชีวิตํ เทถาติ อาห. สากิยา คเหตพฺพคฺคหณํ อปสฺสนฺตา เอกจฺเจ ติณํ ฑํสิตฺวา เอกจฺเจ นฬํ คเหตฺวา อฏฺฐํสุ, "ตุมฺเห สากิยา โนติ ปุจฺฉิตา, ยสฺมา เต มรนฺตาปิ มุสาวาทํ น ภณนฺติ; ตสฺมา ติณํ ฑํสิตฺวา ฐิตา "โน สาโก, ติณนฺติ วทนฺติ, นฬํ คเหตฺวา ฐิตา "โน สาโก, นโฬติ วทนฺติ. เต จ มหานามสฺส สนฺติเก ฐิตา จ ชีวิตํ ลภึสุ. เตสุ ติณํ ฑํสิตฺวา ฐิตา ติณสากิยา นาม, นฬํ คเหตฺวา ฐิตา นฬสากิยา นาม ชาตา. อวเสเส ขีรปเกปิ ทารเก อวิสฺสชฺเชตฺวา ฆาตาเปนฺโต โลหิตนทึ ปวตฺเตตฺวา เตสํ คลโลหิเตน ผลกํ โธวาเปสิ. เอวํ สากิยวํโส วิฑูฑเภน อุปจฺฉินฺโน. โส มหานามสกฺกํ คาหาเปตฺวา นิวตฺโต ปาตราสเวลาย "ปาตราสํ กริสฺสามาติ เอกสฺมึ ฐาเน โอตริตฺวา, โภชเน อุปนีเต, "เอกโต ภุญฺชิสฺสามาติ อยฺยกํ ปกฺโกสาเปสิ. ขตฺติยา ปน ชีวิตํ จชนฺตาปิ ทาสีปุตฺเตน สทฺธึ น ภุญฺชนฺติ; ตสฺมา มหานาโม เอกํ สรํ โอโลเกตฺวา "กิลิฏฺฐคตฺโตมฺหิ, นหายิสฺสามิ ตาตาติ อาห. "สาธุ อยฺยก นหายถาติ. โส "อยํ มํ เอกโต อภุญฺชนฺตํ ฆาเตสฺสติ, สยเมว เม มตํ เสยฺโยติ เกเส มุญฺจิตฺวา อคฺเค คณฺฐึ กตฺวา เกเสสุ ปาทงฺคุฏฺฐเก ปเวเสตฺวา อุทเก นิมุชฺชิ. ตสฺส คุณเตเชน นาคภวนํ อุณฺหาการํ ทสฺเสสิ. นาคราชา "กินฺนุ โขติ อุปธาเรนฺโต ทิสฺวา ตสฺส สนฺติกํ อาคนฺตฺวา ผเณ นิสีทาเปตฺวา นาคภวนํ ปเวเสสิ. โส ทฺวาทสวสฺสานิ ตตฺเถว วสิ. วิฑูฑโภปิ "มยฺหํ อยฺยโก อิทานิ อาคมิสฺสตีติ อาคมยมาโนว นิสีทิ; ตสฺมึ อติจิรายนฺเต, สเร วิจินาเปตฺวา ทีปาโลเกน ปุริสพฺภนฺตรานิปิ โอโลเกตฺวา อทิสฺวา "คโต ภวิสฺสตีติ ปกฺกามิ. โส รตฺติภาเค อจิรวตึ ปตฺวา ขนฺธาวารํ นิเวเสสิ. เอกจฺเจ อนฺโตนทิยํ วาลิกาปุลิเน นิปชฺชึสุ, เอกจฺเจ พหิ ถเล, อนฺโต นิปนฺเนสุปิ ปุพฺเพ อกตปาปกมฺมา อตฺถิ, พหิ นิปนฺเนสุปิ ปุพฺเพ กตปาปกมฺมา อตฺถิ; เตสํ นิปนฺนฏฺฐาเนสุ กิปิลฺลิกา อุฏฺฐหึสุ. เต "มยฺหํ นิปนฺนฏฺฐาเน กิปิลฺลิกา, มยฺหํ นิปนฺนฏฺฐาเน กิปิลฺลิกาติ อุฏฺฐหิตฺวา, อกตปาปกมฺมา อุตฺตริตฺวา ถเล นิปชฺชึสุ, กตปาปกมฺมา โอตริตฺวา วาลิกาปุลิเน นิปชฺชึสุ. ตสฺมึ ขเณ มหาเมโฆ อุฏฺฐหิตฺวา ฆนกรกวสฺสํ วสฺสิ. นทิยา โอโฆ อาคนฺตฺวา วิฑูฑภํ สทฺธึ ปริสาย สมุทฺทเมว ปาเปสิ. สพฺเพ ตตฺถ มจฺฉกจฺฉปภกฺขา อเหสุํ.