มหาชโน กถํ สมุฏฺฐาเปสิ "สากิยานํ มรณํ อยุตฺตํ เอวนฺนาม โกฏฺเฏตฺวา โกฏฺเฏตฺวา สากิยา มาเรตพฺพาติ อนุจฺฉวิกเมตนติ. สตฺถา ตํ กถํ สุตฺวา "ภิกฺขเว อิมสฺมึ อตฺตภาเว กิญฺจาปิ สากิยานํ เอวํ มรณํ อยุตฺตํ, ปุพฺเพ กตปาปกมฺมวเสน ปน ยุตฺตเมว เอเตหิ ลทฺธนฺติ อาห. "กึ ปน ภนฺเต เอเต ปุพฺเพ อกํสูติ. "ปุพฺเพ เอกโต หุตฺวา นทิยํ วิสํ ปกฺขิปึสูติ.

ปุเนกทิวสํ ภิกฺขู ธมฺมสภายํ กถํ สมุฏฺฐาเปสุํ "วิฑูฑโภ เอตฺตเก สากิเย มาเรตฺวา อาคจฺฉนฺโต อตฺตโน มโนรเถ มตฺถกํ อปฺปตฺเต เอว, เอตฺตกํ ชนํ อาทาย สมุทฺทมจฺฉกจฺฉปภกฺโข ชาโตติ. สตฺถา อาคนฺตฺวา "กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา, "อิมาย นามาติ วุตฺเต, "ภิกฺขเว อิเมสํ สตฺตานํ มโนรเถ มตฺถกํ อปฺปตฺเต เอว, มจฺจุราชา สุตฺตํ คามํ อชฺโฌตฺถรนฺโต มโหโฆ วิย ชีวิตินฺทฺริยํ ฉินฺทิตฺวา จตุราปายสมุทฺเท นิมุชฺชาเปตีติ วตฺวา อิมํ คาถมาห

"ปุปฺผานิ เหว ปจินนฺตํ พฺยาสตฺตมนสํ นรํ

สุตฺตํ คามํ มโหโฆว มจฺจุ อาทาย คจฺฉตีติ.