๔. ปติปูชิกาวตฺถุ. (๓๖)

"ปุปฺผานิ เหวาติ อิมํ ธมฺมเทสนํ สตฺถา สาวตฺถิยํ วิหรนฺโต ปติปูชิกํ นาม อิตฺถึ อารพฺภ กเถสิ.

วตฺถุ ตาวตึสเทวโลเก สมุฏฺฐิตํ. ตตฺถ กิร มาลาภารี นาม เทวปุตฺโต อจฺฉราสหสฺสปริวุโต อุยฺยานํ ปาวิสิ. ปญฺจสตา เทวธีตโร รุกฺขํ อารุยฺห ปุปฺผานิ ปาเตนฺติ. ปญฺจสตา ตาหิ ปาติตานิ ปุปฺผานิ คเหตฺวา เทวปุตฺตํ อลงฺกโรนฺติ. ตาสุ เอกา เทวธีตา รุกฺขสาขายเมว จุตา. สรีรํ ทีปสิขา วิย นิพฺพายิ. สา สาวตฺถิยํ เอกสฺมึ กุลเคเห ปฏิสนฺธึ คเหตฺวา ชาตกาเล ชาติสฺสรา หุตฺวา "มาลาภาริเทวปุตฺตสฺส ภริยมฺหีติ อนุสฺสรนฺตี วุฑฺฒิมนฺวาย คนฺธมาลาทิปูชํ กตฺวา สามิกสฺส สนฺติเก อภินิพฺพตฺตึ ปฏฺเฐสิ. สา โสฬสวสฺสกาเล ปรกุลํ คตาปิ สลากภตฺตปกฺขิกภตฺตวสฺสาวาสิกาทีนิ ทตฺวา "อยํ เม สามิกสฺส สนฺติเก นิพฺพตฺตนตฺถาย ปจฺจโย ๑- โหตูติ วทติ. อถสฺสา ภิกฺขู "อยํ อุฏฺฐาย สมุฏฺฐาย ปติเมว ปฏฺเฐตีติ "ปติปูชิกาติ นามํ กรึสุ. สาปิ นิพทฺธํ อาสนสาลํ ปฏิชคฺคติ ปานียํ อุปฏฺฐเปติ อาสนานิ ปญฺญาเปติ. อญฺเญปิ มนุสฺสา สลากภตฺตาทีนิ ทาตุกามา "อมฺม อิมานิปิ ภิกฺขุสงฺฆสฺส ปฏิปาเทยฺยาสีติ อาหริตฺวา เทนฺติ. สาปิ เอเตน นิยาเมน อาคจฺฉนฺตี คจฺฉนฺตี เอกปทวาเร ฉปฺปญฺญาสกุสลธมฺเม ปฏิลภิ. ตสฺสา กุจฺฉิยํ คพฺโภ สมุฏฺฐหิ. สา ทสมาสจฺจเยน ปุตฺตํ