อิตราปิ เอตฺตกํ กาลํ เทวปุตฺตํ อลงฺกโรนฺติ เอว. เทวปุตฺโต ตํ ทิสฺวา "ตฺวํ ปาโต ปฏฺฐาย น ทิสฺสสิ, กุหึ คตาสีติ อาห. "จุตามฺหิ สามีติ. "กึ วเทสีติ. "เอวเมตํ สามีติ. "กุหึ นิพฺพตฺตาสีติ. "สาวตฺถิยํ กุลเคเหติ. "กิตฺตกํ กาลํ ตตฺถ ฐิตาสีติ. "ทสมาสจฺจเยน มาตุกุจฺฉิโต นิกฺขมิตฺวา โสฬสวสฺสกาเล ปติกุลํ คนฺตฺวา จตฺตาโร ปุตฺเต วิชายิตฺวา ทานาทีนิ ปุญฺญานิ กตฺวา ตุมฺเห ปฏฺเฐตฺวา อาคนฺตฺวา ตุมฺหากเมว สนฺติเก นิพฺพตฺตมฺหิ ๑- สามีติ. "มนุสฺสานํ กิตฺตกํ อายุนฺติ. "วสฺสสตมตฺตนฺติ. "เอตฺตกเมวาติ. "อาม สามีติ. "เอตฺตกํ อายุํ คเหตฺวา นิพฺพตฺตา มนุสฺสา กินฺนุ โข สุตฺตปฺปมตฺตา กาลํ อติกฺกาเมนฺติ, อุทาหุ ทานาทีนิ ปุญฺญานิ กโรนฺตีติ. "กึ วเทถ สามิ, อสงฺเขยฺยํ อายุํ คเหตฺวา นิพฺพตฺตา วิย อชรามรา วิย นิจฺจปฺปมตฺตา มนุสฺสาติ. มาลาภาริเทวปุตฺตสฺส มหาสํเวโค อุทปาทิ "วสฺสสตมตฺตํ อายุํ คเหตฺวา นิพฺพตฺตา มนุสฺสา กิร ปมตฺตา นิปชฺชิตฺวา นิทฺทายนฺติ, กทา นุ โข ทุกฺขา มุจฺจิสฺสนฺตีติ.

อมฺหากํ ปน วสฺสสตํ ตาวตึสานํ เทวานํ เอโก รตฺตินฺทิโว, ตาย รตฺติยา ตึส รตฺติโย มาโส, เตน มาเสน ทฺวาทสมาสิโก