ปุนทิวเส ภิกฺขู คามํ ปวิฏฺฐา อาสนสาลํ อปฺปฏิชคฺคิตํ อาสนานิ อปฺปญฺญตฺตานิ ปานียํ อนุปฏฺฐปิตํ ทิสฺวา "กหํ ปติปูชิกาติ อาหํสุ. "ภนฺเต กหํ ตุมฺเห ตํ ทกฺขิสฺสถ, หีโย อยฺเยสุ ภุญฺชิตฺวา คเตสุ, สายณฺหสมเย มตาติ. ตํ สุตฺวา ปุถุชฺชนภิกฺขู เอติสฺสา อุปการํ สรนฺตา อสฺสูนิ สนฺธาเรตุํ นาสกฺขึสุ, ขีณาสวานํ ธมฺมสํเวโค อุทปาทิ. เต ภตฺตกิจฺจํ กตฺวา วิหารํ คนฺตฺวา สตฺถารํ วนฺทิตฺวา ปุจฺฉึสุ "ภนฺเต ปติปูชิกา นาม อุปาสิกา อุฏฺฐาย สมุฏฺฐาย นานปฺปการานิ ปุญฺญานิ กตฺวา สามิกเมว ปฏฺเฐสิ, สา อิทานิ มตา, กหํ นุ โข นิพฺพตฺตาติ. "อตฺตโน สามิกสฺเสว สนฺติเก ภิกฺขเวติ. "นตฺถิ ภนฺเต สามิกสฺส สนฺติเกติ. "น สา ภิกฺขเว เอตํ สามิกํ ปฏฺเฐสิ, ตาวตึสภวเน ตสฺสา มาลาภาริเทวปุตฺโต นาม สามิโก, สา ตสฺส ปุปฺผปิลนฺธนฏฺฐานโต จวิตฺวา ปุน คนฺตฺวา ตสฺเสว สนฺติเก นิพฺพตฺตาติ. "เอวํ กิร ภนฺเตติ. "อาม ภิกฺขเวติ. "อโห ปริตฺตํ ภนฺเต สตฺตานํ ชีวิตํ, ปาโตว อมฺเห ปริวิสิตฺวา สายํ อุปฺปนฺนพฺยาธินา มตาติ. สตฺถา "อาม ภิกฺขเว ปริตฺตํ สตฺตานํ ชีวิตํ นาม, เตเนวิเม สตฺเต วตฺถุกาเมหิ เจว กิเลสกาเมหิ จ อติตฺเต เอว อนฺตโก อตฺตโน วเส วตฺเตตฺวา กนฺทนฺเต ปริเทวนฺเต คเหตฺวา คจฺฉตีติ วตฺวา อิมํ คาถมาห

"ปุปฺผานิ เหว ปจินนฺตํ พฺยาสตฺตมนสํ นรํ

อติตฺตํเยว กาเมสุ อนฺตโก กุรุเต วสนฺติ.

ตตฺถ "ปุปฺผานิ เหว ปจินนฺตนฺติ: ปุปฺผาราเม มาลากาโร นานาปุปฺผานิ วิย อตฺตภาวปฺปฏิพทฺธานิ เจว อุปกรณปฺปฏิพทฺธานิ จ กามคุณปุปฺผานิ โอจินนฺตเมว. พฺยาสตฺตมนสํ นรนฺติ: อสมฺปตฺเตสุ ปตฺถนาวเสน สมฺปตฺเตสุ เคธวเสน วิวิเธนากาเรน อาสตฺตจิตฺตํ. อติตฺตํเยว กาเมสูติ: วตฺถุกามกิเลสกาเมสุ ปริเยสเนนปิ ปฏิลาเภนปิ ปริโภเคนปิ นิธาเนนปิ อติตฺตํ เอว สมานํ. อนฺตโก กุรุเต วสนฺติ มรณสงฺขาโต อนฺตโก กนฺทนฺตํ ปริเทวนฺตํ คเหตฺวา คจฺฉนฺโต อตฺตโน วสํ ปาเปตีติ อตฺโถ.