อถ สตฺถา ปาโตว มหาโมคฺคลฺลานตฺเถรํ อามนฺเตสิ "เอโส โมคฺคลฺลาน ราชคหสฺส อวิทูเร สกฺกรนิคเม มจฺฉริเสฏฺฐี `กปลฺลปูเว ขาทิสฺสามีติ อญฺเญสํ ทสฺสนภเยน สตฺตภูมิเก ปาสาเท กปลฺลปูเว ปาจาเปติ, ตฺวํ ตตฺถ คนฺตฺวา เสฏฺฐึ ทเมตฺวา นิพฺพิเสวนํ กตฺวา อุโภปิ ชายปติเก ปูเว จ ขีรสปฺปิมธุผาณิตานิ จ คาหาเปตฺวา อตฺตโน พเลน เชตวนํ อาเนหิ; อชฺชาหํ ปญฺจหิ ภิกฺขุสเตหิ สทฺธึ วิหาเรเยว นิสีทิสฺสามิ, ปูเวเหว ภตฺตกิจฺจํ กริสฺสามีติ อาห. เถโรปิ "สาธุ ภนฺเตติ สตฺถุ วจนํ สมฺปฏิจฺฉิตฺวา ตาวเทว อิทฺธิพเลน ตํ นิคมํ คนฺตฺวา ตสฺส ปาสาทสฺส สีหปญฺชรทฺวาเร สุนิวตฺโถ สุปารุโต อากาเส เอว มณิรูปกํ วิย อฏฺฐาสิ. มหาเสฏฺฐิโน เถรํ ทิสฺวาว หทยมํสํ กมฺปิ. โส "อหํ เอวรูปานํเยว ภเยน อิมํ ฐานํ อาคโต, อยญฺจ อาคนฺตฺวา วาตปานทฺวาเร ฐิโตติ คเหตพฺพคฺคหณํ อปสฺสนฺโต อคฺคิมฺหิ ปกฺขิตฺตโลณสกฺขรา วิย โรเสนฺโต ตฏตฏายนฺโต เอวมาห "สมณ อากาเส ฐตฺวา กึ ลภิสฺสสิ, อากาเส อปเท ปทํ ทสฺเสตฺวา จงฺกมนฺโตปิ เนว ลภิสฺสสีติ. เถโร ตสฺมึเอว ฐาเน อปราปรํ จงฺกมิ. เสฏฺฐี "จงฺกมนฺโต กึ ลภิสฺสสิ, อากาเส ปลฺลงฺเกน นิสีทนฺโตปิ น ลภิสฺสสิเยวาติ อาห. เถโร ปลฺลงฺกํ อาภุชิตฺวา นิสีทิ. อถ นํ "อากาเส นิสินฺโน กึ ลภิสฺสสิ, อาคนฺตฺวา วาตปานอุมฺมาเร ฐิโตปิ น ลภิสฺสสีติ อาห. เถโร อุมฺมาเร อฏฺฐาสึ. อถ นํ "อุมฺมาเร ฐิโต กึ ลภิสฺสสิ, ธูมายนฺโตปิ น ลภิสฺสสิเยวาติ อาห. เถโรปิ ธูมายิ. สกลปาสาโท เอกธูโม อโหสิ. เสฏฺฐิโน อกฺขีนํ สูจิยา วิชฺฌนกาโล วิย อโหสิ. เคหชฺฌายนภเยน ตํ "ปชฺชลนฺโตปิ น ลภิสฺสสีติ อวตฺวา "อยํ สมโณ สุฏฺฐุ ลคฺโค อลทฺธา น คมิสฺสติ, เอกมสฺส ปูวํ ทาเปสฺสามีติ ภริยํ อาห "ภทฺเท เอกํ ขุทฺทกปูวํ ปจิตฺวา สมณสฺส ทตฺวา อุยฺโยเชหิ นนฺติ. สา โถกํเอว ปิฏฺฐํ กปลฺลปาติยํ ปกฺขิปิ. มหาปูโว หุตฺวา สกลปาตึ ปูเรตฺวา อุทฺธุมาโต อฏฺฐาสิ. เสฏฺฐี ตํ ทิสฺวา "พหุํ ตยา ปิฏฺฐํ คหิตํ ภวิสฺสตีติ, สยเมว ทพฺพิกณฺเณน โถกํ ปิฏฺฐํ คเหตฺวา ปกฺขิปิ. ปูโว ปุริมปูวโต มหนฺตตโร ชาโต. เอวํ ยํ ยํ ปจติ, โส โส มหนฺตมหนฺโตว โหติ. โส นิพฺพินฺโน ภริยํ อาห "ภทฺเท อิมสฺส เอกํ ปูวํ เทหีติ. ตสฺสา ปจฺฉิโต เอกํ คณฺหนฺติยา, สพฺเพ เอกาพทฺธา อลฺลิยึสุ. สา เสฏฺฐึ อาห "สามิ สพฺเพ ปูวา เอกาพทฺธา, วิสุํ กาตุํ น สกฺโกมีติ. "อหํ กริสฺสามีติ โสปิ กาตุํ นาสกฺขิ. อุโภปิ ชนา โกฏิยํ คเหตฺวา กฑฺฒนฺตาปิ วิโยเชตุํ นาสกฺขึสุเอว. อถสฺส ปูเวหิ สทฺธึ วายมนฺตสฺเสว สรีรโต เสทา มุจฺจึสุ, ปิปาสา อุปจฺฉิชฺชิ. ตโต ภริยํ อาห "ภทฺเท น เม ปูเวหิ อตฺโถ, สมณสฺส เทหีติ. สา ปจฺฉึ อาทาย เถรํ อุปสงฺกมิ. เถโร อุภินฺนํปิ ธมฺมํ เทเสสิ, ติณฺณํ รตนานํ คุณํ กเถสิ, "อตฺถิ ทินฺนํ, อตฺถิ ยิฏฺฐนฺติ ทินฺนทานาทีนํ ผลํ คคณตเล จนฺทํ วิย ทสฺเสสิ. ตํ สุตฺวา ปสนฺนจิตฺโต เสฏฺฐี "ภนฺเต อาคนฺตฺวา อิมสฺมึ ปลฺลงฺเก นิสีทิตฺวา ปริภุญฺชถาติ อาห. เถโร "มหาเสฏฺฐิ สมฺมาสมฺพุทฺโธ `ปูเว ขาทิสฺสามีติ ปญฺจหิ ภิกฺขุสเตหิ สทฺธึ วิหาเร นิสินฺโน; ตุมฺหากํ รุจิยา สติ, เสฏฺฐิ ภริยํ ปูเว จ ขีราทีนิ จ คณฺหาเปถ, สตฺถุ สนฺติกํ คมิสฺสามาติ อาห. "กหํ ปน ภนฺเต เอตรหิ สตฺถาติ. "อิโต ปญฺจจตฺตาฬีสโยชนมตฺถเก เชตวนวิหาเร เสฏฺฐีติ. "ภนฺเต กาลํ อนติกฺกมิตฺวา เอตฺตกํ อทฺธานํ กถํ คมิสฺสามาติ. "มหาเสฏฺฐิ ตุมฺหากํ รุจิยา สติ, อหํ โว อตฺตโน พเลน ๑- เนสฺสามิ; ตุมฺหากํ ปาสาเท โสปาณสีสํ อตฺตโน ฐาเน เอว ภวิสฺสติ, โสปาณปริโยสานํ ปน เชตวนทฺวารโกฏฺฐเก ภวิสฺสติ, อุปริปาสาทา เหฏฺฐาโอตรณกาลมตฺเตเนว ๒- เชตวนํ เนสฺสามีติ. โส "สาธุ ภนฺเตติ สมฺปฏิจฺฉิ. เถโร โสปาณสีสํ ตตฺเถว กตฺวา "โสปาณปาทมูลํ เชตวนทฺวารโกฏฺฐเก โหตูติ อธิฏฺฐาสิ. ตเถว อโหสิ. เถโร เสฏฺฐิญฺจ ภริยญฺจ อุปริปาสาทา