ปุนทิวเส สายณฺหสมเย ธมฺมสภายํ สนฺนิปติตา ภิกฺขู "ปสฺสถาวุโส มหาโมคฺคลฺลานตฺเถรสฺส อานุภาวํ, อนุปหจฺจ นาม สทฺธํ อนุปหจฺจ โภเค มจฺฉริเสฏฺฐึ มุหุตฺเตน ทมิตฺวา นิพฺพิเสวนํ กตฺวา ปูเว คาหาเปตฺวา เชตวนํ อาเนตฺวา สตฺถุ สมฺมุขํ กตฺวา โสตาปตฺติผเล ปติฏฺฐาเปสิ, อโห มหานุภาโว เถโรติ เถรสฺส คุณกถํ กเถนฺตา นิสีทึสุ. สตฺถา ทิพฺพาย โสตธาตุยา ภิกฺขูนํ กถํ สุตฺวา อาคนฺตฺวา "กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา, "อิมาย นามาติ วุตฺเต, "ภิกฺขเว กุลทมเกน นาม ภิกฺขุนา อนุปหจฺจ สทฺธํ อนุปหจฺจ โภเค กุลํ อกิลเมตฺวา อวิเหเฐตฺวา ปุปฺผโต เรณุํ คณฺหนฺเตน ภมเรน วิย อุปสงฺกมิตฺวา พุทฺธคุณํ ชานาเปตพฺพํ, ตาทิโส มม ปุตฺโต โมคฺคลฺลาโนติ เถรํ ปสํสิตฺวา อิมํ คาถมาห

"ยถาปิ ภมโร ปุปฺผํ วณฺณคนฺธํ อเหฐยํ

ปเลติ รสมาทาย; เอวํ คาเม มุนี จเรติ.