"น ปเรสํ วิโลมานีติ อิมํ ธมฺมเทสนํ สตฺถา สาวตฺถิยํ วิหรนฺโต ปาฏิกํ นาม อาชีวกํ อารพฺภ กเถสิ.

สาวตฺถิยํ กิร เอกา คหปตานี ปุตฺตฏฺฐาเน ฐเปตฺวา ปาฏิกํ นาม อาชีวกํ ปฏิชคฺคติ. ตสฺสานนฺตรฆเรสุ มนุสฺสา สตฺถุ ธมฺมเทสนํ สุตฺวา อาคนฺตฺวา "อโห อจฺฉริยา พุทฺธานํ ธมฺมเทสนาติ นานปฺปกาเรหิ พุทฺธคุเณ วณฺเณนฺติ. สา พุทฺธานํ คุณกถํ สุตฺวา วิหารํ คนฺตฺวา ธมฺมํ โสตุกามา ตมตฺถํ อาชีวกสฺส กเถตฺวา "คจฺฉิสฺสามหํ พุทฺธสฺส สนฺติกํ อยฺยาติ อาห. โส "มา คจฺฉาหีติ นิวาเรตฺวา ตํ ปุนปฺปุนํ ยาจมานมฺปิ นิวาเรสิ เอว. สา "อยํ มม วิหารํ คนฺตฺวา ธมฺมํ โสตุํ น เทติ, สตฺถารํ นิมนฺเตตฺวา อิเธว ธมฺมํ สุณิสฺสามีติ สายณฺหสมเย ปุตฺตํ ปกฺโกสิตฺวา "คจฺฉ, สฺวาตนาย สตฺถารํ นิมนฺเตหีติ เปเสสิ. โส คจฺฉนฺโต ปฐมตรํ อาชีวกสฺส วสนฏฺฐานํ คนฺตฺวา ตํ วนฺทิตฺวา นิสีทิ. อถ นํ โส "กหํ คจฺฉสีติ อาห. "มาตุ วจเนน สตฺถารํ นิมนฺเตตุํ คจฺฉามีติ. "มา ตสฺส สนฺติกํ คจฺฉาหีติ. "อลํ อยฺย, [๑]- คจฺฉิสฺสามหนฺติ. "เอตสฺส กตสกฺการํ อุโภปิ ขาทิสฺสาม, มา คจฺฉาติ. "อลํ อยฺย, มาตา เม ตชฺเชสฺสตีติ. "เตนหิ คจฺฉ, คนฺตฺวา จ ปน นิมนฺเตตฺวา `อมฺหากํ เคหํ อสุกฏฺฐาเน วา อสุกวีถิยํ วา อสุกมคฺเคน วา คนฺตพฺพนฺติ มา อาจิกฺข, สนฺติเก ฐิโต วิย อญฺเญน