ตตฺถ "รุจิรนฺติ; โสภนํ. วณฺณวนฺตนฺติ: วณฺณสณฺฐานสมฺปนฺนํ. อคนฺธกนฺติ: คนฺธรหิตํ ปาลิภทฺทกคิริกณฺณิกชยกุสุมาทิเภทํ. เอวํ สุภาสิตา วาจาติ: สุภาสิตา วาจา นาม เตปิฏกํ พุทฺธวจนํ, ตํ วณฺณสณฺฐานสมฺปนฺนอคนฺธกปุปฺผสทิสํ. ยถา ปน อคนฺธกํ ปุปฺผํ โย นํ ธาเรติ, ตสฺส สรีเร คนฺโธ น ผรติ; เอวํ เอตํปิ, โย นํ สกฺกจฺจํ สวนาทีหิ น สมาจรติ, ตสฺส สกฺกจฺจํ อสมาจรนฺตสฺส, ยํ ตตฺถ กตฺตพฺพํ, ตํ อกุพฺพโต สุตคนฺธํ ธารณคนฺธํ ปฏิปตฺติคนฺธญฺจ น อาวหติ อผลํ โหติ; เตน วุตฺตํ "เอวํ สุภาสิตา วาจา อผลา โหติ อกุพฺพโตติ. สคนฺธกนฺติ. จมฺปกนีลุปฺปลาทิเภทํ. เอวนฺติ: ยถา ตํ ปุปฺผํ ธาเรนฺตสฺส สรีเร คนฺโธ ผรติ; เอวํ เตปิฏกพุทฺธวจนสงฺขาตา สุภาสิตา วาจาปิ สุกุพฺพโต, โย สกฺกจฺจํ สวนาทีหิ ตตฺถ กตฺตพฺพํ กโรติ, อสฺส ปุคฺคลสฺส สผลา โหติ สุตคนฺธธารณคนฺธปฏิปตฺติคนฺธานํ อาวหนโต มหปฺผลา โหติ มหานิสํสาติ อตฺโถ.

เทสนาวสาเน พหู โสตาปตฺติผลาทีนิ ปตฺตา. เทสนา มหาชนสฺส สาตฺถิกา ชาตาติ.

ฉตฺตปาณิอุปาสกวตฺถุ.

๘. วิสาขาวตฺถุ. (๔๐)