"ยถาปิ ปุปฺผราสิมฺหาติ อิมํ ธมฺมเทสนํ สตฺถา สาวตฺถึ อุปนิสฺสาย ปุพฺพาราเม วิหรนฺโต วิสาขํ อุปาสิกํ อารพฺภ กเถสิ.

สา กิร องฺครฏฺเฐ ภทฺทิยนคเร เมณฺฑกเสฏฺฐิปุตฺตสฺส ธนญฺชยเสฏฺฐิโน อคฺคมเหสิยา สุมนาเทวิยา กุจฺฉิสฺมึ นิพฺพตฺติ. ตสฺสา สตฺตวสฺสิกกาเล สตฺถา เสลพฺราหฺมณาทีนํ โพธเนยฺยพนฺธวานํ อุปนิสฺสยสมฺปตฺตึ ทิสฺวา มหาภิกฺขุสงฺฆปริวาโร จาริกํ จรมาโน ตํ นครํ ปาปุณิ. ตสฺมิญฺจ สมเย เมณฺฑโก คหปติ ตสฺมึ นคเร ปญฺจนฺนํ มหาปุญฺญานํ เชฏฺฐโก หุตฺวา เสฏฺฐิฏฺฐานํ กาเรติ. ปญฺจ มหาปุญฺญา นาม "เมณฺฑโก เสฏฺฐี, จนฺทปทุมา นาม ตสฺเสว เชฏฺฐกภริยา, ตสฺเสว เชฏฺฐกปุตฺโต ธนญฺชโย นาม, ตสฺส ภริยา สุมนาเทวี นาม, เมณฺฑกเสฏฺฐิสฺส ทาโส ปุณฺโณ นามาติ. น เกวลญฺจ เมณฺฑกเสฏฺฐีเยว, พิมฺพิสารรญฺโญ ปน วิชิเต ปญฺจ อมิตโภคา นาม อเหสุํ "โชติโย, ชฏิโล, เมณฺฑโก, ปุณฺณโก, กากวลฺลิโยติ. เตสุ อยํ เมณฺฑกเสฏฺฐี ทสพลสฺส อตฺตโน นครํ สมฺปตฺตภาวํ ญตฺวา ปุตฺตสฺส ธนญฺชยเสฏฺฐิโน ธีตรํ วิสาขํ ทาริกํ ปกฺโกสาเปตฺวา อาห "อมฺม ตุยฺหํปิ มงฺคลํ, อมฺหากํปิ มงฺคลํ; ตว ปริวาเรหิ ปญฺจหิ ทาริกาสเตหิ สทฺธึ ปญฺจ รถสตานิ อารุยฺห ปญฺจหิ ทาสีสเตหิ ปริวุตา ทสพลสฺส ปจฺจุคฺคมนํ กโรหีติ. สา "สาธูติ ปฏิสฺสุณิตฺวา ตถา อกาสิ. การณาการเณสุ ปน กุสลตฺตา ยาวติกา ยานสฺส ภูมิ, ยาเนน คนฺตฺวา ยานา ปจฺโจโรหิตฺวา ปตฺติกาว สตฺถารํ อุปสงฺกมิตฺวา วนฺทิตฺวา เอกมนฺตํ อฏฺฐาสิ. อถสฺสา ปุพฺพจริยวเสน สตฺถา ธมฺมํ เทเสสิ. สา เทสนาวสาเน ปญฺจหิ ทาริกาสเตหิ สทฺธึ โสตาปตฺติผเล ปติฏฺฐหิ. เมณฺฑกเสฏฺฐีปิ โข สตฺถารํ อุปสงฺกมิตฺวา ธมฺมกถํ สุตฺวา โสตาปตฺติผเล ปติฏฺฐาย สฺวาตนาย นิมนฺเตตฺวา ปุนทิวเส อตฺตโน นิเวสเน ปณีเตน ขาทนีเยน โภชนีเยน พุทฺธปฺปมุขํ ภิกฺขุสงฺฆํ ปริวิสิตฺวา เอเตเนว อุปาเยน อฑฺฒมาสํ มหาทานํ อทาสิ. สตฺถา ภทฺทิยนคเร ยถาภิรนฺตํ วิหริตฺวา ปกฺกามิ.

เตน โข ปน สมเยน พิมฺพิสาโร จ ปเสนทิโกสโล จ อญฺญมญฺญํ ภคินีปติกา โหนฺติ. อเถกทิวสํ โกสลราชา จินฺเตสิ "พิมฺพิสารสฺส วิชิเต ปญฺจ อมิตโภคา มหาปุญฺญา วสนฺติ, มยฺหํ วิชิเต เอโกปิ ตาทิโส นตฺถิ; ยนฺนูนาหํ พิมฺพิสารสฺส สนฺติกํ คนฺตฺวา เอกํ มหาปุญฺญํ ยาเจยฺยนฺติ. โส ตตฺถ คนฺตฺวา รญฺญา กตปฏิสนฺถาโร "กึการณา อาคโตสีติ ปุฏฺโฐ "ตุมฺหากํ วิชิเต ปญฺจ อมิตโภคา มหาปุญฺญา วสนฺติ, ตโต เอกํ คเหตฺวา คมิสฺสามีติ อาคโตมฺหิ, เตสุ เม เอกํ เทถาติ อาห. "มหากุลานิ อมฺเหหิ จาเลตุํ น สกฺกาติ. "อหํ อลทฺธา น คมิสฺสามีติ. ราชา อมจฺเจหิ สทฺธึ มนฺเตตฺวา "โชติยาทีนํ มหากุลานํ จาลนํ นาม ปฐวิยา จาลนสทิสํ, เมณฺฑกมหาเสฏฺฐิสฺส ปุตฺโต ธนญฺชยเสฏฺฐี นาม อตฺถิ, เตน สทฺธึ มนฺเตตฺวาว ปฏิวจนํ เต ทสฺสามีติ วตฺวา ตํ ปกฺโกสาเปตฺวา "ตาต โกสลราชา `เอกํ ธนเสฏฺฐึ คเหตฺวา คมิสฺสามีติ วทติ, ตฺวํ เตน สทฺธึ คจฺฉาหีติ. "ตุมฺเหสุ ปหิณนฺเตสุ, คมิสฺสามิ เทวาติ. "เตนหิ ปริวจฺฉํ กตฺวา คจฺฉ ตาตาติ. โส อตฺตโน กตฺตพฺพยุตฺตกํ อกาสิ. ราชาปิสฺส มหนฺตํ สกฺการํ กตฺวา "อิมํ อาทาย คจฺฉถาติ ปเสนทิโกสลราชานํ อุยฺโยเชสิ. โส ตํ อาทาย สพฺพตฺถ เอกรตฺติวาเสน คจฺฉนฺโต เอกํ ผาสุกฏฺฐานํ ปตฺวา นิวาสํ คณฺหิ. อถ นํ ธนญฺชยเสฏฺฐี ปุจฺฉิ "อิทํ กสฺส วิชิตนฺติ. "มยฺหํ เสฏฺฐีติ. "กีวทูโร อิโต สาวตฺถีติ. "สตฺตโยชนมตฺถเกติ. "อนฺโตนครํ สมฺพาธํ, อมฺหากํ ปริชโน มหนฺโต, สเจ โรเจถ, อิเธว วเสยฺยาม เทวาติ. ราชา "สาธูติ สมฺปฏิจฺฉิตฺวา ตสฺมึ ฐาเน นครํ มาเปตฺวา ตสฺส ทตฺวา อคมาสิ. ตสฺมึ ปเทเส สายํ วสนฏฺฐานสฺส คหิตตฺตา นครสฺส "สาเกตนฺเตฺวว นามํ อโหสิ.