เอวํ มหาเสฏฺฐี จตูหิ มาเสหิ ธีตุ ปริวจฺฉํ กตฺวา ตสฺสา เทยฺยธมฺมํ ททมาโน กหาปณปูรานิ ปญฺจ สกฏสตานิ อทาสิ, สุวณฺณภาชนปูรานิ ปญฺจ สกฏสตานิ รชตภาชนปูรานิ ปญฺจ ตมฺพภาชนปูรานิ ปญฺจ กํสภาชนปูรานิ ปญฺจ สุตฺตวตฺถโกเสยฺยวตฺถปูรานิ ปญฺจ สปฺปิปูรานิ ปญฺจ เตลปูรานิ ปญฺจ ผาณิตปูรานิ ปญฺจ สาลิตณฺฑุลปูรานิ ปญฺจ นงฺคลผาลาทิอุปกรณปูรานิ ปญฺจ สกฏสตานิ อทาสิ. เอวํ กิรสฺส อโหสิ "มม ธีตาย คตฏฺฐาเน `อสุเกน นาม เม อตฺโถติ มา ปรสฺส เคหทฺวารํ ปหิณีติ; ตสฺมา สพฺพุปกรณานิ ทาเปสิ. เอเกกสฺมึ รเถ สพฺพาลงฺการปฺปฏิมณฺฑิตา ติสฺโส ติสฺโส วณฺณทาสิโย ฐเปตฺวา ปญฺจ รถสตานิ อทาสิ, "เอตฺตกา นหาเปนฺติโย โภเชนฺติโย อลงฺกโรนฺติโย วิจรถาติ ทิยฑฺฒสหสฺสปริจาริกาโย อทาสิ. อถสฺส เอตทโหสิ "มม ธีตุ คาโว ทสฺสามีติ. โส ปุริเส อาณาเปสิ "คจฺฉถ ภเณ, จูฬวชสฺส ทฺวารํ วิวริตฺวา ตีสุ คาวุเตสุ ติสฺโส เภริโย คเหตฺวา ติฏฺฐถ, ปุถุลโต อุสภมตฺเต ฐาเน อุโภสุ ปสฺเสสุ ติฏฺฐถ, คาวีนํ ตโต ปรํ คนฺตุํ มา เทถ, เอวํ ฐิตกาเล เภริสญฺญํ กเรยฺยาถาติ. เต ตถา อกํสุ. เต คาวีนํ วชโต นิกฺขมิตฺวา คาวุตํ คตกาเล เภริสญฺญํ อกํสุ, ปุน อฑฺฒโยชนํ คตกาเล เภริสญฺญํ อกํสุ, ปุน ติคาวุตํ คตกาเล ปุถุลโต คมนญฺจ นิวาเรสุํ. เอวํ ทีฆโต ติคาวุเต ปุถุลโต อุสภมตฺเต ฐาเน คาวิโย อญฺญมญฺญํ นิฆํสนฺติโย อฏฺฐํสุ. มหาเสฏฺฐี "มม ธีตุ เอตฺตกา คาโว อลํ, ทฺวารํ ปิทหถาติ วชทฺวารํ ปิทหาเปสิ. ตสฺมึ ปิทหิเต, วิสาขาย ปุญฺญผเลน พลวคาโว จ เธนุโย จ อุปฺปติตฺวา นิกฺขมึสุ. มนุสฺสานํ นิวาเรนฺตานเมว, สฏฺฐิสหสฺสา พลวคาโว จ สฏฺฐิสหสฺสา เธนุโย จ นิกฺขนฺตา, ตตฺตกา พลววจฺฉา, ตาสํ เธนูนํ อุสภา อนุพนฺธา ๑- อเหสุํ. "กิสฺส ปน นิสฺสนฺเทน เอวํ คาโว คตาติ. นิวาเรนฺตานํ นิวาเรนฺตานํ ทินฺนทานสฺส ผเลน. สา กิร กสฺสปสมฺมาสมฺพุทฺธกาเล กิกิสฺส รญฺโญ สตฺตนฺนํ ธีตานํ กนิฏฺฐา สงฺฆทาสี นาม หุตฺวา วีสติยา ภิกฺขุสหสฺสานํ ปญฺจโครสทานํ ททมานา, ทหรานญฺจ สามเณรานญฺจ ปตฺตํ ปิทหิตฺวา "อลํ อลนฺติ นิวาเรนฺตานํปิ, "อิทํ มธุรํ, อิทํ