อถ "เสฺว มม ธีตา คมิสฺสตีติ คพฺเภ นิสินฺโน ธีตรํ สมีเป นิสีทาเปตฺวา "อมฺม ปติกุเล วสนฺติยา นาม อิมญฺจ อิมญฺจ อาจารํ รกฺขิตุํ วฏฺฏตีติ โอวาทํ อทาสิ. อยมฺปิ มิคารเสฏฺฐี อนนฺตรคพฺเภ นิสินฺโน ธนญฺชยเสฏฺฐิโน โอวาทํ อสฺโสสิ. โสปิ เสฏฺฐี ธีตรํ เอวํ โอวทิ "อมฺม สสุรกุเล วสนฺติยา นาม อนฺโตอคฺคิ พหิ น นีหริตพฺโพ, พหิอคฺคิ อนฺโต น ปเวเสตพฺโพ, ททนฺตสฺเสว ทาตพฺพํ, อททนฺตสฺส น ทาตพฺพํ, ททนฺตสฺสาปิ อททนฺตสฺสาปิ ทาตพฺพํ, สุขํ นิสีทิตพฺพํ, สุขํ ภุญฺชิตพฺพํ, สุขํ นิปชฺชิตพฺพํ, อคฺคิ ปริจริตพฺโพ, อนฺโตเทวตา นมสฺสิตพฺพาติ อิมํ ทสวิธํ โอวาทํ ทตฺวา ปุนทิวเส สพฺพา เสนิโย สนฺนิปาเตตฺวา ราชเสนาย มชฺเฌ อฏฺฐ กุฏุมฺพิเก ปาฏิโภเค คเหตฺวา "สเจ เม คตฏฺฐาเน ธีตุ โทโส อุปฺปชฺชติ, ตุมฺเหหิ โสเธตพฺโพติ วตฺวา นวโกฏิอคฺฆนเกน มหาลตาปสาธเนน ธีตรํ ปสาเธตฺวา นหานจุณฺณมูลกํ จตุปฺปณฺณาสโกฏิธนํ ทตฺวา ยานํ อาโรเปตฺวา สาเกตสฺส สามนฺตา อตฺตโน สนฺตเกสุ อนุราธปุรมตฺเตสุ จุทฺทสสุ ภุตฺตคาเมสุ เภริญฺจาราเปสิ "มม ธีตรา สทฺธึ คนฺตุกามา คจฺฉนฺตูติ. สทฺทํ สุตฺวาว "อมฺหากํ อยฺยาย คมนกาเล กึ อมฺหากํ อิธาติ จุทฺทสคามา ๑- กิญฺจิ อเสเสตฺวา นิกฺขมึสุ. ธนญฺชยเสฏฺฐีปิ รญฺโญ จ มิคารเสฏฺฐิโน จ สกฺการํ กตฺวา โถกํ อนุคนฺตฺวา เตหิ สทฺธึ ธีตรํ อุยฺโยเชสิ.

มิคารเสฏฺฐี สพฺพปจฺฉโต ยานเก นิสีทิตฺวา คจฺฉนฺโต พลกายํ ทิสฺวา "เก นาเมเตติ ปุจฺฉิ. "สุณิสาย โว เวยฺยาวจฺจกรา ทาสีทาสาติ. "เอตฺตเก โก โปเสสฺสติ, โปเถตฺวา เต ปลาเปถ, อปลายนฺเต อิโต นิกฺกฑฺฒถาติ. วิสาขา ปน "อเปถ, มา วาเรถ, พลเมว พลสฺส ภตฺตํ ทสฺสตีติ อาห. เสฏฺฐี, เอวํ วุตฺเตปิ, "อมฺม นตฺถิ อมฺหากํ เอเตหิ อตฺโถ, โก เอเต โปเสสฺสตีติ เลฑฺฑุทณฺฑาทีหิ โปถาเปตฺวา ปลาเปตฺวา เสสเก "อลํ อมฺหากํ เอตฺตเกหีติ คเหตฺวา ปายาสิ.

อถ วิสาขา สาวตฺถีนครทฺวารํ สมฺปตฺตกาเล จินฺเตสิ "ปฏิจฺฉนฺนยานสฺมึ นุ โข นิสีทิตฺวา ปวิสิสฺสามิ, อุทาหุ รเถ ฐตฺวาติ. อถสฺสา เอตทโหสิ "ปฏิจฺฉนฺนยาเนน เม ปวิสนฺติยา, มหาลตาปสาธนสฺส วิเสโส น ปญฺญายิสฺสตีติ. สา สกลนครสฺส อตฺตานํ ทสฺเสนฺตี รเถ ฐตฺวา นครํ ปาวิสิ. สาวตฺถีวาสิโน วิสาขาย สมฺปตฺตึ ทิสฺวา "เอสา กิร วิสาขา นาม, เอวรูปา อยํ สมฺปตฺติ เอติสฺสาว อนุจฺฉวิกาติ อาหํสุ. อิติ สา มหาสมฺปตฺติยา เสฏฺฐิโน