@๒. สี. ยุ. อุปคนฺตุํ น วิสหนฺตีติ นตฺถิ. ตุมฺเหหิ อุทกติตฺถโต กุมฺภทาสี วิย อานีตา, ธรมานกมาตาปิตูนํ ธีตโร นาม น เอตฺตเกเนว นิกฺขมนฺติ; เอเตเนว เม การเณน ปิตา อิธาคมนกาเล อฏฺฐ กุฏุมฺพิเก ปกฺโกสาเปตฺวา `สเจ เม ธีตุ โทโส อุปฺปชฺชติ, โสเธยฺยาถาติ วตฺวา มํ เตสํ หตฺเถ ฐเปสิ, เต ปกฺโกสาเปตฺวา มยฺหํ โทสํ โสธาเปถาติ. เสฏฺฐี "กลฺยาณํ เอสา กเถตีติ อฏฺฐ กุฏุมฺพิเก ปกฺโกสาเปตฺวา "อยํ ทาริกา มงฺคลกาเล นิสีทิตฺวา สุวณฺณปาติยํ นิรุทกปายาสํ ปริภุญฺชนฺตํ มํ `อสุจิขาทโกติ วทติ, อิมิสฺสา โทสํ อาโรเปตฺวา อิมํ อิโต นิกฺกฑฺฒถาติ. "เอวํ กิร อมฺมาติ. "นาหํ เอวํ วทามิ, เอกสฺมึ ปน ปิณฺฑจาริกตฺเถเร ฆรทฺวาเร ฐิเต, สสุโร เม อปฺโปทกํ มธุปายาสํ ปริภุญฺชนฺโต ตํ น มนสิกโรติ, อหํ `มยฺหํ สสุโร อิมสฺมึ อตฺตภาเว ปุญฺญํ น กโรติ ปุราณปุญฺญเมว ขาทตีติ จินฺเตตฺวา `อติจฺฉถ ภนฺเต, มยฺหํ สสุโร ปุราณํ ขาทตีติ อวจํ; เอตฺถ เม โก โทโสติ. "อยฺย อิธ โทโส นตฺถิ, อมฺหากํ ธีตา ยุตฺตํ กเถติ, ตฺวํ กสฺมา กุชฺฌสีติ. "อยฺยา เอส ตาว โทโส มา โหตุ, อยํ ปน เอกทิวสํ มชฺฌิมยาเม ทาสทาสีหิ ปริวุตา ปจฺฉาเคหํ อคมาสีติ. "เอวํ กิร อมฺมาติ. "ตาตา นาหํ อญฺเญน การเณน คตา, อิมสฺมึ ปน เคเห อาชานียวฬวาย วิชาตาย, `สญฺญํปิ อกตฺวา นิสีทิตุํ อยุตฺตนฺติ ทณฺฑทีปเก คาหาเปตฺวา ทาสีหิ สทฺธึ คนฺตฺวา วฬวาย วิชาตาย ปริหารํ การาเปสึ, เอตฺถ เม โก โทโสติ. "อยฺย อมฺหากํ ธีตา ตว เคเห ทาสีหิปิ อกตฺตพฺพกมฺมํ กโรติ, ตฺวํ เอตฺถ กึ โทสํ ปสฺสสีติ. "อยฺยา อิธาปิ ตาว โทโส มา โหตุ, อิมิสฺสา ปน ปิตา อิธาคมนกาเล อิมํ โอวทนฺโต คุยฺหปฺปฏิจฺฉนฺเน ทส โอวาเท อทาสิ, เตสํ อตฺถํ น ชานามิ, เตสํ เม อตฺถํ กเถตุ; อิมิสฺสา ปน ปิตา `อนฺโตอคฺคิ พหิ น นีหริตพฺโพติ อาห, สกฺกา นุ โข อมฺเหหิ อุภโต ปฏิวิสฺสกเคหานํ อคฺคึ อทตฺวา วสิตุนฺติ. "เอวํ กิร อมฺมาติ. "ตาตา มยฺหํ ปิตา น เอตํ สนฺธาย กเถสิ, อิทํ ปน สนฺธาย กเถสิ `อมฺม ตว สสฺสุสสุรสามิกานํ อคุณํ ทิสฺวา พหิ ตสฺมึ ตสฺมึ เคเห ฐตฺวา มา กเถสีติ, เอวรูเปน หิ อคฺคินา สทิโส อคฺคิ นาม นตฺถีติ. "อยฺยา เอตํ ตาว โหตุ, อิมิสฺสา ปน ปิตา `พาหิรโต อคฺคิ น อนฺโต ปเวเสตพฺโพติ อาห, กึ สกฺกา อมฺเหหิ อนฺโตอคฺคิมฺหิ นิพฺพุเต, พาหิรโต อคฺคึ อนาหริตุนฺติ. "เอวํ กิร อมฺมาติ. "ตาตา มยฺหํ ปิตา น เอตํ สนฺธาย กเถสิ, อิทํ ปน สนฺธาย กเถสิ `สเจ เต ปฏิวิสฺสกเคเหสุ อิตฺถิโย วา ปุริสา วา สสฺสุสสุรสามิกานํ อคุณํ กเถนฺติ, เตหิ กถิตํ อาหริตฺวา `อสุโก นาม ตุมฺหากํ เอวํ อคุณํ กเถตีติ ปุน มา กเถยฺยาสีติ, เอเตน หิ อคฺคินา สทิโส อคฺคิ นาม นตฺถีติ. เอวํ อิมสฺมึ การเณ สา นิทฺโทสา อโหสิ. ยถา จ เอตฺถ, เอวํ เสเสสุปิ. เตสุ ปน อยํ อธิปฺปาโย: ยํปิ หิ ตสฺสา ปิตรา "อมฺม เย ททนฺติ เตสํเยว ทาตพฺพนฺติ วุตฺตํ, ตํ `ยาจิตํ อุปกรณํ คเหตฺวา เย ปฏิเทนฺติ, เตสํเยว ทาตพฺพนฺติ สนฺธาย วุตฺตํ. "เย น เทนฺติ, เตสํ น ทาตพฺพนฺติ อิทํปิ "เย ยาจิตกํ คเหตฺวา น ปฏิเทนฺติ, เตสํ น ทาตพฺพนฺติ สนฺธาย วุตฺตํ. "ททนฺตสฺสาปิ อททนฺตสฺสาปิ ทาตพฺพนฺติ อิทํ ปน "ทลิทฺเทสุ ญาติมิตฺเตสุ สมฺปตฺเตสุ, เต ปฏิทาตุํ สกฺโกนฺตุ วา มา วา, เตสํ ทาตุเมว วฏฺฏตีติ สนฺธาย วุตฺตํ. "สุขํ นิสีทิตพฺพนฺติ อิทํปิ "สสฺสุสสุรสามิเก ทิสฺวา วุฏฺฐาตพฺพฏฺฐาเน นิสีทิตุํ น วฏฺฏตีติ สนฺธาย วุตฺตํ. "สุขํ ภุญฺชิตพฺพนฺติ อิทํ ปน "สสฺสุสสุรสามิเกหิ ปุเรตรํ อภุญฺชิตฺวา เต ปริวิสิตฺวา สพฺเพหิ ลทฺธาลทฺธํ ญตฺวา ปจฺฉา สยํ ภุญฺชิตุํ วฏฺฏตีติ สนฺธาย วุตฺตํ. "สุขํ นิปชฺชิตพฺพนฺติ อิทํปิ "สสฺสุสสุรสามิเกหิ ปุเรตรํ สยนํ อารุยฺห น นิปชฺชิตพฺพํ, เตสํ กตฺตพฺพยุตฺตกํ วตฺตปฺปฏิวตฺตํ กตฺวา ปจฺฉา สยํ นิปชฺชิตุํ ยุตฺตนฺติ อิทํ สนฺธาย วุตฺตํ. "อคฺคิ ปริจริตพฺโพติ อิทํ ปน "สสฺสุํปิ สสุรํปิ สามิกํปิ อคฺคิกฺขนฺธํ วิย อุรคราชานํ วิย จ กตฺวา ปสฺสิตุํ วฏฺฏตีติ สนฺธาย วุตฺตํ. "อนฺโตเทวตา นมสฺสิตพฺพาติ อิทํปิ "สสฺสุญฺจ สสุรญฺจ สามิกญฺจ เทวตํ วิย กตฺวา ทฏฺฐุํ วฏฺฏตีติ สนฺธาย วุตฺตํ. เอวํ เสฏฺฐี อิเมสํ ทสนฺนํ โอวาทานํ อตฺถํ สุตฺวา ปฏิวจนํ อปสฺสนฺโต อโธมุโข นิสีทิ.