"โสหํ อชฺช ปชานามิ ยตฺถ ทินฺนํ มหปฺผลํ,

อตฺถาย วต เม ภทฺทา สุณิสา ฆรมาคตาติ.

วิสาขา ปุนทิวสตฺถายปิ สตฺถารํ นิมนฺเตสิ. ปุนทิวเสปิ สสฺสุ โสตาปตฺติผลํ ปตฺตา. ตโต ปฏฺฐาย ตํ เคหํ สาสนสฺส วิวฏทฺวารํ อโหสิ. ตโต เสฏฺฐี จินฺเตสิ "พหูปการา เม สุณิสา, ปณฺณาการมสฺสา กริสฺสามิ, เอติสฺสา หิ ภาริยํ ปสาธนํ, นิจฺจกาลํ ปสาธิตุํ น สกฺกา, สลฺลหุกมสฺสา ทิวา จ รตฺโต จ สพฺพิริยาปเถสุ ปสาธนโยคฺคํ ปสาธนํ กาเรสฺสามีติ สตสหสฺสคฺฆนิกํ ฆนมฏฺฐกํ นาม ปสาธนํ กาเรตฺวา, ตสฺมึ นิฏฺฐิเต, พุทฺธปฺปมุขํ ภิกฺขุสงฺฆํ นิมนฺเตตฺวา สกฺกจฺจํ โภเชตฺวา วิสาขํ โสฬสหิ คนฺโธทกฆเฏหิ นหาเปตฺวา สตฺถุ สมฺมุเข ฐเปตฺวา สตฺถารํ วนฺทาเปสิ. สตฺถา อนุโมทนํ กตฺวา วิหารเมว คโต.

วิสาขาปิ ตโต ปฏฺฐาย ทานาทีนิ ปุญฺญานิ กโรนฺตี สตฺถุ สนฺติกา อฏฺฐ วเร ลภิตฺวา คคณตเล จนฺทเลขา วิย ปญฺญายมานา ปุตฺตธีตาหิ วุฑฺฒึ ปาปุณิ. ตสฺสา กิร ทส ปุตฺตา ทส ธีตโร อเหสุํ, เตสุ เอเกกสฺส ทส ทส ปุตฺตา จ ธีตโร จ อเหสุํ, เตสุปิ เอเกกสฺส ทส ทส ปุตฺตา จ ธีตโร จาติ: เอวมสฺสา ปุตฺตนตฺตปนตฺตสนฺตานวเสน ปวตฺตานิ วีสาธิกานิ จตฺตาริ สตานิ อฏฺฐ จ ปาณสหสฺสานิ อเหสุํ. ๑- สยํ วีสวสฺสสตํ อฏฺฐาสิ, สีเส เอกํปิ ปลิตํ นาม