ภิกฺขู ตสฺสา สทฺทํ สุตฺวา สตฺถุ อาโรจยึสุ "ภนฺเต อมฺเหหิ เอตฺตเก อทฺธาเน วิสาขาย คายนํ นาม น ทิฏฺฐปุพฺพํ, สา อชฺช ปุตฺตนตฺตปริวุตา คายมานา ปาสาทํ อนุปริยายติ, กินฺนุ ขฺวสฺสา ปิตฺตํ กุปิตํ, อุทาหุ อุมฺมตฺติกา ชาตาติ. สตฺถา "น ภิกฺขเว มยฺหํ ธีตา คายติ, อตฺตโน ปนสฺสา อชฺฌาสโย ปริปุณฺโณ, สา `ปตฺถิตปฺปตฺถนา เม มตฺถกํ ปตฺตาติ ตุฏฺฐมานสา อุทานํ อุทาเนนฺตี วิจรตีติ วตฺวา, "กทา ปน ภนฺเต ตาย ปตฺถนา ปตฺถิตาติ วุตฺเต, "สุณิสฺสถ ภิกฺขเวติ, "สุณิสฺสาม ภนฺเตติ วุตฺเต, อตีตํ อาหริ:

ภิกฺขเว อิโต กปฺปสตสหสฺสมตฺถเก ปทุมุตฺตโร นาม พุทฺโธ โลเก นิพฺพตฺติ, ตสฺส วสฺสสตสหสฺสํ อายุ อโหสิ, ขีณาสวานํ สตสหสฺสํ ปริวาโร, นครํ หํสวตี นาม, ปิตา สุนนฺโท นาม ราชา, มาตา สุชาตา นาม เทวี. ตสฺส สตฺถุ อคฺคุปฏฺฐายิกา อุปาสิกา อฏฺฐ วเร ยาจิตฺวา มาติฏฺฐาเน ฐตฺวา สตฺถารํ จตูหิ ปจฺจเยหิ ปฏิชคฺคนฺตี สายํ ปาตํ อุปฏฺฐานํ คจฺฉติ. ตสฺสา เอกา สหายิกา ตาย สทฺธึ นิพทฺธํ วิหารํ คจฺฉติ. สา ตสฺสา สตฺถารา สทฺธึ วิสฺสาเสน กถนญฺจ วลฺลภภาวญฺจ ทิสฺวา "กินฺนุ โข กตฺวา เอวํ พุทฺธานํ วลฺลภา โหตีติ จินฺเตตฺวา สตฺถารํ ปุจฺฉิ "ภนฺเต เอสา อิตฺถี ตุมฺหากํ กึ โหตีติ. "อุปฏฺฐายิกานํ อคฺคาติ. "ภนฺเต กึ กตฺวา อุปฏฺฐายิกานํ อคฺคา โหตีติ. "กปฺปสตสหสฺสํ ปตฺถนํ ปฏฺเฐตฺวาติ. "อิทานิ ปฏฺเฐตฺวา ลทฺธุํ สกฺกา ภนฺเตติ. "อาม สกฺกาติ. "เตนหิ ภนฺเต ภิกฺขุสตสหสฺเสน สทฺธึ สตฺตาหํ มยฺหํ ภิกฺขํ คณฺหถาติ อาห. สตฺถา อธิวาเสสิ. สา สตฺตาหํ ทานํ ทตฺวา โอสานทิวเส จีวรสาฏเก ทตฺวา สตฺถารํ วนฺทิตฺวา ปาทมูเล นิปชฺชิตฺวา "ภนฺเต นาหํ อิมสฺส ทานสฺส ผเลน เทวิสฺสริยาทีนํ อญฺญตรํ ปฏฺเฐมิ, ตุมฺหาทิสสฺส พุทฺธสฺส สนฺติเก อฏฺฐ วเร ลภิตฺวา มาติฏฺฐาเน ฐตฺวา จตูหิ ปจฺจเยหิ ปฏิชคฺคิตุํ สมตฺถานํ อคฺคา ภเวยฺยนฺติ ปตฺถนํ ปฏฺเฐสิ. สตฺถา "สมิชฺฌิสฺสติ นุ โข อิมิสฺสา ปตฺถนาติ อนาคตํ อาวชฺเชนฺโต กปฺปสตสหสฺสํ โอโลเกตฺวา "กปฺปสตสหสฺส- ปริโยสาเน โคตโม นาม พุทฺโธ อุปฺปชฺชิสฺสติ, ตทา ตฺวํ วิสาขา นาม อุปาสิกา หุตฺวา ตสฺส สนฺติเก อฏฺฐ วเร ลภิตฺวา มาติฏฺฐาเน ฐตฺวา จตูหิ ปจฺจเยหิ ปฏิชคฺคนฺตีนํ อุปฏฺฐายิกานํ อคฺคา ภวิสฺสสีติ อาห. ตสฺสา สา สมฺปตฺติ เสฺวว ลทฺธพฺพา วิย อโหสิ. สา ยาวตายุกํ ปุญฺญํ กตฺวา ตโต จุตา เทวโลเก นิพฺพตฺติตฺวา เทวมนุสฺเสสุ สํสรนฺตี กสฺสปสมฺมาสมฺพุทฺธกาเล กิกิสฺส กาสีรญฺโญ สตฺตนฺนํ ธีตานํ กนิฏฺฐา สงฺฆทาสี นาม หุตฺวา ปรกุลํ อคนฺตฺวา ตาหิ ภคินีหิ สทฺธึ ทีฆรตฺตํ ทานาทีนิ ปุญฺญานิ กตฺวา กสฺสป- สมฺมาสมฺพุทฺธปาทมูเลปิ "อนาคเต ตุมฺหาทิสสฺส พุทฺธสฺส สนฺติเก อฏฺฐ วเร ลภิตฺวา มาติฏฺฐาเน ฐตฺวา จตุปฺปจฺจยทายิกานํ อคฺคา ภเวยฺยนฺติ ปตฺถนํ อกาสิ; ตโต ปฏฺฐาย ปน เทวมนุสฺเสสุ สํสรนฺตี อิมสฺมึ อตฺตภาเว เมณฺฑกเสฏฺฐิปุตฺตสฺส ธนญฺชยเสฏฺฐิโน ธีตา หุตฺวา นิพฺพตฺติ, มยฺหํ สาสเน พหูนิ ปุญฺญานิ อกาสิ.