ตตฺถ ยถา วลฺลิสนฺตานุพทฺเธสุ ๑- กุฏทารูสุ ๒- น วลฺลิสนฺตานา ชานนฺติ "อเมฺหหิ กุฏทารูนิ อาพทฺธานี"ติ, นปิ กุฏทารูนิ ๓- ชานนฺติ "มยํ วลฺลิสนฺตาเนหิ อาพทฺธานี"ติ, เอวเมว น นหารู ชานนฺติ "อเมฺหหิ ตีณิ อฏฺฐิสตานิ อาพทฺธานี"ติ, นปิ ตีณิ อฏฺฐิสตานิ ชานนฺติ "มยํ นหารูหิ อาพทฺธานี"ติ. อาโภคปจฺจเวกฺขณวิรหิตา หิ เอเต ธมฺมา ฯเปฯ น ปุคฺคโลติ. เกวลนฺตุ:-

นว นหารุสตา โหนฺติ พฺยามมตฺเต กเฬวเร

พนฺธนฺติ อฏฺฐิสงฺฆาฏํ อคารมิว วลฺลิโยติ.

ปริจฺเฉทโต เหฏฺฐา ตีหิ อฏฺฐิสเตหิ ตตฺถ ปติฏฺฐิตตเลหิ จ ๔- อุปริ ตจมํเสหิ ติริยํ อญฺญมญฺเญน ปริจฺฉินฺนาติ ววตฺถเปติ. อยเมเตสํ สภาคปริจฺเฉโท, วิสภาคปริจฺเฉโท ปน เกสสทิโส เอวาติ เอวํ นหารู วณฺณาทิโต ววตฺถเปติ.