"ยาวชีวมฺปิ เจ พาโล ปณฺฑิตํ ปยิรุปาสติ,

น โส ธมฺมํ วิชานาติ, ทพฺพิ สูปรสํ ยถาติ.

ตสฺสตฺโถ "พาโล นาเมส ยาวชีวมฺปิ ปณฺฑิตํ อุปสงฺกมนฺโต ปยิรุปาสนฺโต "อิทํ พุทฺธวจนํ, เอตฺตกํ พุทฺธวจนนฺติ เอวํ ปริยตฺติธมฺมํ วา "อยํ วิหาโร, อยํ อาจาโร, อยํ โคจโร; อิทํ สาวชฺชํ, อิทํ อนวชฺชํ, อิทํ เสวิตพฺพํ, อิทํ น เสวิตพฺพํ; อิทํ ปฏิวิชฺฌิตพฺพํ, อิทํ สจฺฉิกาตพฺพนฺติ เอวํ ปฏิปตฺติปฺปฏิเวธธมฺมํ วา น ชานาติ. ยถา กึ? ทพฺพิ สูปรสํ ยถาติ ยถา หิ ทพฺพิ ยาว ปริกฺขยา นานปฺปการาย สูปวิกติยา สมฺปริวตฺตมานาปิ "อิทํ โลณิกํ, อิทํ อโลณิกํ, อิทํ ติตฺตกํ, อิทํ ขาริกํ, อิทํ กฏุกํ, อิทํ อมฺพิลํ, อิทํ อนมฺพิลํ, อิทํ กสาวนฺติ สูปรสํ น ชานาติ; เอวเมว พาโล ยาวชีวํ ปณฺฑิตํ ปยิรุปาสมาโน วุตฺตปฺปการํ ธมฺมํ น ชานาตีติ.

เทสนาวสาเน อาคนฺตุกภิกฺขูนํ อาสเวหิ จิตฺตานิ วิมุจฺจึสูติ.