สา กิร ปทุมุตฺตรพุทฺธสฺส ปาทมูเล ปตฺถนํ ปฏฺฐเปตฺวา กปฺปสตสหสฺสํ ปุญฺญานิ กุรุมานา เทเวสุ จ มนุสฺเสสุ จ สํสรนฺตี อิมสฺมึ พุทฺธุปฺปาเท เทวโลกโต จวิตฺวา สาวตฺถิยํ เสฏฺฐิกุเล ปฏิสนฺธึ คณฺหิ. นีลุปฺปลคพฺภสมานวณฺณตาย จสฺสา "อุปฺปลวณฺณาเตฺวว นามํ อกํสุ. อถสฺสา วยปฺปตฺตกาเล สกลชมฺพุทีเป ราชาโน จ เสฏฺฐิโน จ เสฏฺฐิสฺส สนฺติกํ ปณฺณาการํ ปหิณึสุ "ธีตรํ อมฺหากํ เทตูติ. อปฺปหิณนฺโต นาม นาโหสิ. ตโต เสฏฺฐี จินฺเตสิ "อหํ สพฺเพสํ มนํ คเหตุํ น สกฺขิสฺสามิ, อุปายํ ปเนกํ กริสฺสามีติ. โส ธีตรํ ปกฺโกสิตฺวา "อมฺม ปพฺพชิตุํ สกฺขิสฺสสีติ อาห. ตสฺสา ปจฺฉิมภวิกตฺตา ปิตุ วจนํ สีเส อาสิตฺตสตปากเตลํ วิย อโหสิ; ตสฺมา ปิตรํ "ปพฺพชิสฺสามิ ตาตาติ อาห. โส ตสฺสา มหนฺตํ สกฺการํ กตฺวา ตํ ภิกฺขุนูปสฺสยํ เนตฺวา ปพฺพาเชสิ. ตสฺสา อจิรปฺปพฺพชิตาย เอว อุโปสถาคาเร ตาลวาโร ปาปุณิ. สา ทีปํ ชาเลตฺวา อุโปสถาคารํ สมฺมชฺชิตฺวา ทีปสิขาย นิมิตฺตํ คณฺหิตฺวา ฐิตาว ปุนปฺปุนํ โอโลกยมานา เตโชกสิณารมฺมณํ ฌานํ นิพฺพตฺเตตฺวา ตเมว ปาทกํ กตฺวา อรหตฺตํ ปาปุณิ สทฺธึ ปฏิสมฺภิทาหิ เจว อภิญฺญาหิ จ. สา อปเรน สมเยน ชนปทจาริกํ จริตฺวา ปจฺจาคตา อนฺธวนํ ปาวิสิ. ตทา ภิกฺขุนีนํ อรญฺญวาโส อปฺปฏิกฺขิตฺโต โหติ. อถสฺสา มนุสฺสา ตตฺถ กุฏิกํ กตฺวา มญฺจกํ ปญฺญาเปตฺวา สาณิยา ปริกฺขิปึสุ. สา สาวตฺถิยํ ปิณฺฑาย ปวิสิตฺวา นิกฺขมิ. มาตุลปุตฺโต ปนสฺสา นนฺทมาณโว คิหิกาลโต ปฏฺฐาย ปฏิพทฺธจิตฺโต ตสฺสา อาคตภาวํ สุตฺวา เถริยา อาคมนโต ปุเรตรเมว อนฺธวนํ คนฺตฺวา ตํ กุฏิกํ ปวิสิตฺวา เหฏฺฐามญฺเจ นิลีโน, เถริยา อาคนฺตฺวา กุฏิกํ ปวิสิตฺวา ทฺวารํ ปิธาย มญฺจเก นิสินฺนมตฺตาย, พหิ อาตปโต อาคตตฺตา จกฺขุปเถ อนฺธกาเร อวิคเตเยว, เหฏฺฐามญฺจโต นิกฺขมิตฺวา มญฺจกํ อภิรุยฺห "มา นสฺสิ พาล, มา นสฺสิ พาลาติ เถริยา วาริยมาโน อภิภวิตฺวา อตฺตโน ปฏฺฐิตกมฺมํ กตฺวา ปายาสิ. อถสฺส อคุณํ ธาเรตุํ อสกฺโกนฺตี วิย มหาปฐวี เทฺวธา ภิชฺชิ. โส ปฐวึ ปวิฏฺโฐ คนฺตฺวา มหาอวีจิมฺหิ นิพฺพตฺติ. เถรีปิ ตมตฺถํ ภิกฺขุนีนํ อาโรเจสิ. ภิกฺขุนิโย ภิกฺขูนํ ตมตฺถํ อาโรเจสุํ. ภิกฺขู ภควโต อาโรเจสุํ. ตํ สุตฺวา สตฺถา ภิกฺขู อามนฺเตตฺวา "ภิกฺขเว ภิกฺขุภิกฺขุนีอุปาสกอุปาสิกาสุ โย โกจิ พาโล ปาปกมฺมํ กโรนฺโต มธุสกฺขราทีสุ กญฺจิเทว มธุรรสํ ขาทมาโน ปุริโส วิย หฏฺฐปฺปหฏฺโฐ อุทคฺคุทคฺโค วิย กโรตีติ อนุสนฺธึ ฆเฏตฺวา ธมฺมํ เทเสนฺโต อิมํ คาถมาห