อถ ปฐมยาเม จตฺตาโร มหาราชาโน จตุทฺทิสา เอโกภาสํ กโรนฺตา อุปฏฺฐานํ อาคมึสุ. ชมฺพุโก โอภาสํ ทิสฺวา "กึโอภาโส นาเมโสติ จินฺเตสิ. มชฺฌิมยาเม สกฺโก เทวราชา อาคมิ. ชมฺพุโก ตมฺปิ ทิสฺวา "โก นาเมโสติ จินฺเตสิ. ปจฺฉิมยาเม เอกาย องฺคุลิยา เอกํ ทฺวีหิ เทฺว ฯเปฯ ทสหิ ทส จกฺกวาฬานิ โอภาเสตุํ สมตฺโถ มหาพฺรหฺมา สกลอรญฺญํ เอโกภาสํ กโรนฺโต อาคมิ. ชมฺพุโก ตมฺปิ ทิสฺวา "โก นุ โข เอโสติ จินฺเตตฺวา ปาโตว สตฺถุ สนฺติกํ คนฺตฺวา ปฏิสนฺถารํ กตฺวา เอกมนฺตํ ฐิโต สตฺถารํ ปุจฺฉิ "มหาสมณ ตุมฺหากํ สนฺติกํ จตสฺโส ทิสา โอภาเสนฺโต ปฐมยาเม โก อาคโตติ. "จตฺตาโร มหาราชาโนติ. "กึการณาติ. "มํ อุปฏฺฐาตุนฺติ. "กึ ปน ตฺวํ จตูหิ มหาราเชหิ อุตฺตริตโรติ. "อาม ชมฺพุก, อหญฺหิ ราชูนํ อติราชาติ. "มชฺฌิมยาเม ปน โก อาคโตติ. "สกฺโก เทวราชาติ. "กึการณาติ. "มํ อุปฏฺฐาตุเมวาติ. "กึ ปน ตฺวํ สกฺกเทวราชโตปิ อุตฺตริตโรติ. "อาม ชมฺพุก, สกฺกโตปิ อุตฺตริตโรมฺหิ, เอโส ปน มยฺหํ คิลานุปฏฺฐาโก กปฺปิยการกสามเณรสทิโสติ. "ปจฺฉิมยาเม สกลอรญฺญํ โอภาเสตฺวา โก อาคโตติ. "ยํ นิสฺสาย โลเก พฺราหฺมณาทโยปิ ขิปิตฺวา ปกฺขลิตฺวา `นโม มหาพฺรหฺมุโนติ วทนฺติ, โสเอว มหาพฺรหฺมาติ. "กึ ปน ตฺวํ มหาพฺรหฺมุนาปิ อุตฺตริตโรติ. "อาม ชมฺพุก, อหญฺหิ พฺรหฺมุนาปิ อติพฺรหฺมาติ. "อจฺฉริโยสิ ตฺวํ มหาสมณ, มยฺหํ ปน ปญฺจปณฺณาสวสฺสานิ อิธ วสนฺตสฺส, เอเตสุ เอโกปิ มํ อุปฏฺฐาตุํ นาคตปุพฺโพ; อหญฺหิ เอตฺตกํ อทฺธานํ วาตภกฺโข หุตฺวา ฐิตโกว วีตินาเมสึ, น ตาว เต มยฺหํ อุปฏฺฐานํ อาคตปุพฺพาติ. อถ นํ สตฺถา อาห "ชมฺพุก ตฺวํ โลกสฺมึ อนฺธพาลํ มหาชนํ วญฺจยมาโน มํปิ วญฺเจตุกาโม ชาโต; นนุ ตฺวํ ปญฺจปณฺณาสวสฺสานิ คูถเมว ขาทสิ, ภูมิยํเยว นิปชฺชิ, นคฺโค หุตฺวา วิจริ, ตาลฏฺฐิขณฺเฑน เกเส ลุญฺจิ, อถ จ ปน โลกํ วญฺเจนฺโต `อหํ วาตภกฺโขมฺหิ, เอกปาเทน ติฏฺฐามิ, น นิสีทามิ, น นิปชฺชามีติ วเทสิ, มํปิ วญฺเจตุกาโมสิ; ปุพฺเพปิ ตฺวํ ปาปิกํ ลามิกํ ทิฏฺฐึ นิสฺสาย เอตฺตกํ กาลํ คูถภกฺโขสิ ภูมิสโย นคฺโค วิจรนฺโต ตาลฏฺฐิขณฺเฑน เกสลุญฺจนํ ปตฺโต, อิทานิปิ ปาปิกํ ลามิกํ ทิฏฺฐิเมว คณฺหาสีติ. "กึ ปน มยา กตํ มหาสมณาติ. อถสฺส สตฺถา ปุพฺเพ กตกมฺมํ อาจิกฺขิ. ตสฺส, สตฺถริ กเถนฺเตเยว, สํเวโค อุปฺปนฺโน, หิโรตฺตปฺปํ อุปฏฺฐิตํ. โส อุกฺกุฏิโก นิสีทิ. อถสฺส สตฺถา อุทกสาฏกํ ขิปิตฺวา อทาสิ. โส ตํ นิวาเสตฺวา สตฺถารํ วนฺทิตฺวา เอกมนฺตํ นิสีทิ. สตฺถาปิสฺส อนุปุพฺพีกถํ กเถตฺวา ธมฺมํ เทเสสิ. โส เทสนาวสาเน สห ปฏิสมฺภิทาหิ อรหตฺตํ ปตฺวา สตฺถารํ วนฺทิตฺวา อุฏฺฐายาสนา ปพฺพชฺชญฺจ อุปสมฺปทญฺจ ยาจิ. เอตฺตาวตาสฺส ปุริมกมฺมํ ปริกฺขีณํ. อยญฺหิ ขีณาสวมหาเถรํ จตูหิ อกฺโกเสหิ อกฺโกสิตฺวา, ยาวายํ มหาปฐวี ติคาวุตาธิกํ โยชนํ อุสฺสนฺนา; ตาว อวีจิมฺหิ ปจิตฺวา ตตฺถ ปกฺกาวเสเสน ปญฺจปณฺณาสวสฺสานิ อิมํ วิปฺปการํ ปตฺโต, เตนสฺส ตํ กมฺมํ ขีณํ, วีสติวสฺสสหสฺสานิ อิมินา กตสฺส สมณธมฺมสฺส ผลํ นาเสตุํ น สกฺกา; ตสฺมา ตํ สตฺถา ทกฺขิณหตฺถํ ปสาเรตฺวา "เอหิ ภิกฺขุ จร พฺรหฺมจริยนฺติ อาห. ตาวเทวสฺส คิหิลิงฺคํ อนฺตรธายิ, อฏฺฐปริกฺขารธโร สฏฺฐิวสฺสตฺเถโร วิย อโหสิ.