ตตฺถ ยถา ปิโลติกาย ปลิเวฐิเต มํเส ปิโลติกา น ชานาติ "มยา มํสํ ปลิเวฐิตนฺ"ติ, นปิ มํสํ ชานาติ "อหํ ปิโลติกาย ปลิเวฐิตนฺ"ติ, เอวเมว น กิโลมกํ ชานาติ "มยา หทยวกฺกานิ สกลสรีเร จมฺมสฺส เหฏฺฐโต มํสํ จ ปริโยนทฺธิตฺวาฏฺฐิตนฺ"ติ. ๓- นปิ หทยวกฺกานิ สกลสรีเร จมฺมสฺส เหฏฺฐโต จ มํสํ ชานาติ "อหํ กิโลมเกน ปลิเวฐิตนฺ"ติ. อาโภคปจฺจเวกฺขณวิรหิตา หิ เอเต ธมฺมา ฯเปฯ น ปุคฺคโลติ. ปริจฺเฉทโต เหฏฺฐา มํเสน อุปริ จมฺเมน ติริยํ กิโลมกภาเคน ปริจฺฉินฺนนฺติ ววตฺถเปติ. อยเมตสฺส สภาคปริจฺเฉโท, วิสภาคปริจฺเฉโท ปน เกสสทิโส เอวาติ เอวํ กิโลมกํ วณฺณาทิโต ววตฺถเปติ.

ตโต ปรํ สรีรสฺส อพฺพนฺตเร ปิหกํ วณฺณโต นีลมิลาตนิคุณฺฑิปุปฺผวณฺณนฺติ ๔- ววตฺถเปติ. สณฺฐานโต เยภุยฺเยน สตฺตงฺคุลปฺปมาณํ อพนฺธนํ กาฬวจฺฉกชิวฺหาสณฺฐานํ. ทิสโต อุปริมาย ทิสาย ชาตํ. โอกาสโต หทยสฺส วามปสฺเส อุทรปฏลสฺส มตฺถกปสฺสํ นิสฺสาย ฐิตํ, ยมฺหิ ปหรณปฺปหาเรน พหิ นิกฺขนฺเต สตฺตานํ ชีวิตกฺขโย โหตีติ.

ตตฺถ ยถา โกฏฺฐกมตฺถกปสฺสํ นิสฺสาย ฐิตา โคมยปิณฺฑิ น ชานาติ "อหํ โกฏฺฐกมตฺถกปสฺสํ นิสฺสาย ฐิตา"ติ, นปิ โกฏฺฐกมตฺถกปสฺสํ ชานาติ "โคมยปิณฺฑิ มํ นิสฺสาย ฐิตา"ติ, เอวเมว น ปิหกํ ชานาติ "อหํ อุทรปฏลสฺส มตฺถกปสฺสํ นิสฺสาย ฐิตนฺ"ติ, นปิ อุทรปฏลสฺส มตฺถกปสฺสํ ชานาติ "ปิหกํ มํ นิสฺสาย ฐิตนฺ"ติ. อาโภคปจฺจเวกฺขณวิรหิตา หิ เอเต ธมฺมา ฯเปฯ น ปุคฺคโลติ. ปริจฺเฉทโต ปิหกํ ปิหกภาเคน ปริจฺฉินฺนนฺติ ววตฺถเปติ. อยเมตสฺส สภาคปริจฺเฉโท, วิสภาคปริจฺเฉโท ปน เกสสทิโส เอวาติ เอวํ ปิหกํ วณฺณาทิโต ววตฺถเปติ.