@๓ ฉ.ม. มํสํ ปลิเวฐิตนฺติ ๔ ฉ.ม. นีลํ มิลาตนิคฺคุณฺฑี...
ตโต ปรํ สรีรสฺส อพฺภนฺตเร ทฺวตฺตึสมํสขณฺฑปฺปเภทมฺปิ ๑- ปปฺผาสํ วณฺณโต รตฺตปริปกฺกอุทุมฺพรวณฺณนฺติ ๒- ววตฺถเปติ. สณฺฐานโต วิสมจฺฉินฺนปูวขณฺฑ- สณฺฐานํ. ๓- ฉทนิฏฺฐกขณฺฑปุญฺชสณฺฐานนฺติปิ เอเก. ตเทตํ อพฺภนฺตเร อสิตปีตาทีนํ อภาเว อุคฺคเตน กมฺมชเตชุสฺมินา อพฺภาหตตฺตา สงฺขาทิตปลาลปิณฺฑมิว นิรสํ นิโรชํ โหติ. ทิสโต อุปริมาย ทิสาย ชาตํ. โอกาสโต สรีรพฺภนฺตเร ทฺวินฺนํ ถนานํ อพฺภนฺตเร หทยญฺจ ยกนญฺจ อุปริจฺฉาเทตฺวา โอลมฺพนฺตํ ฐิตนฺติ.
ตตฺถ ยถา ชิณฺณโกฏฺฐพฺภนฺตเร ลมฺพมาโน สกุณกุลาวโก น ชานาติ "อหํ ชิณฺณโกฏฺฐพฺภนฺตเร ลมฺพมาโน ฐิโต"ติ, นปิ ชิณฺณโกฏฺฐพฺภนฺตรํ ชานาติ "สกุณกุลาวโก มยิ ลมฺพมาโน ฐิโต"ติ, เอวเมว น ปปฺผาสํ ชานาติ "อหํ สรีรพฺภนฺตเร ทฺวินฺนํ ถนานํ อพฺภนฺตเร ลมฺพมานํ ฐิตนฺ"ติ, นปิ สรีรพฺภนฺตเร ทฺวินฺนํ ถนานํ อพฺภนฺตรํ ชานาติ "มยิ ปปฺผาสํ ลมฺพมานํ ฐิตนฺ"ติ. อาโภคปจฺจเวกฺขณวิรหิตา หิ เอเต ธมฺมา ฯเปฯ น ปุคฺคโลติ. ปริจฺเฉทโต ปปฺผาสํ ปปฺผาสภาเคน ปริจฺฉินฺนนฺติ ววตฺถเปติ. อยเมตสฺส สภาคปริจฺเฉโท, วิสภาคปริจฺเฉโท ปน เกสสทิโส เอวาติ เอวํ ปปฺผาสํ วณฺณาทิโต ววตฺถเปติ.