9. Upātidhāvantisuttavaṇṇanā

[59] Navame rattandhakāratimisāyanti rattiyaṃ andhakāre mahātimisāyaṃ. Rattipi hi andhakāravirahitā hoti, yā puṇṇamāya ratti juṇhobhāsitā. Andhakāropi "timisā"ti na vattabbo hoti abbhamahikādiupakkilesavirahite deve. Mahandhakāro hi "timisā"ti vuccati. Ayampana amāvasī ratti devo ca meghapaṭalasañchanno. Tena vuttaṃ "rattandhakāratimisāyanti rattiyā andhakāre mahātimisāyan"ti. Abbhokāseti appaṭicchanne okāse vihāraṅgaṇe. Telappadīpesu jhāyamānesūti telappajjotesu jalamānesu.

Nanu ca bhagavato byāmappabhā pakatiyā byāmamattappadesaṃ abhibyāpetvā candimasūriyālokaṃ abhibhavitvā ghanabahalaṃ buddhālokaṃ vissajjentī andhakāraṃ vidhamitvā tiṭṭhati, kāyappabhāpi nīlapītādivasena chabbaṇṇā ghanabuddharaṃsiyo vissajjetvā pakatiyāva samantato asītihatthappadesaṃ obhāsentī tiṭṭhati, evaṃ buddhālokeneva ekobhāsabhūte bhagavato nisinnokāse padīpakaraṇakiccaṃ natthīti? saccaṃ natthi, tathāpi puññatthikā upāsakā bhagavato bhikkhusaṃghassa ca pūjākaraṇatthaṃ devasikaṃ telappadīpaṃ upaṭṭhapenti. Tathā hi vuttaṃ sāmaññaphalepi "ete maṇḍalamāle dīpā jhāyantī"ti. "rattandhakāratimisāyan"ti idampi tassā rattiyā sabhāvakittanatthaṃ vuttaṃ, na pana bhagavato nisinnokāsassa andhakārabhāvato. Pūjākaraṇatthameva hi tadāpi upāsakehi padīpā kāritā.