7. Cūḷavagga

1. Paṭhamalakuṇṭakabhaddiyasuttavaṇṇanā

[61] Cūḷavaggassa paṭhame lakuṇṭakabhaddiyanti ettha bhaddiyoti tassa āyasmato nāmaṃ, kāyassa pana rassattā "lakuṇṭakabhaddiyo"ti naṃ sañjānanti. So kira sāvatthivāsī kulaputto mahaddhano mahābhogo rūpena apāsādiko dubbaṇṇo duddasiko okoṭimako. So ekadivasaṃ satthari jetavane viharante upāsakehi saddhiṃ vihāraṃ gantvā dhammadesanaṃ sutvā paṭiladdhasaddho pabbajitvā laddhūpasampado satthu santike kammaṭṭhānaṃ gahetvā vipassanāya kammaṃ karonto sotāpattiphalaṃ pāpuṇi. Tadā sekkhā bhikkhū yebhuyyena āyasmantaṃ sāriputtaṃ upasaṅkamitvā uparimaggatthāya kammaṭṭhānaṃ yācanti, dhammadesanaṃ yācanti, pañhaṃ pucchanti. So tesaṃ adhippāyaṃ pūrento kammaṭṭhānaṃ ācikkhati, dhammaṃ deseti, pañhaṃ vissajjeti. Te ghaṭentā vāyamantā appekacce sakadāgāmiphalaṃ, appekacce anāgāmiphalaṃ, appekacce arahattaphalaṃ, appekacce tisso vijjā, appekacce chaḷabhiññā appekacce catasso paṭisambhidā adhigacchanti. Te disvā lakuṇṭakabhaddiyopi sekkho samāno kālaṃ ñatvā attano cittakallatañca sallekhañca paccavekkhitvā dhammasenāpatiṃ upasaṅkamitvā katapaṭisanthāro sammodamāno dhammadesanaṃ yāci. Sopissa ajjhāsayānurūpaṃ dhammaṃ kathesi. Tena vuttaṃ "tena kho pana samayena āyasmā sāriputto āyasmantaṃ lakuṇṭakabhaddiyaṃ anekapariyāyena dhammiyā kathāya sandassetī"tiādi.

Tattha anekapariyāyenāti "itipi pañcakkhandhā aniccā, itipi dukkhā, itipi anattā"ti evaṃ anekehi kāraṇehi. Dhammiyā kathāyāti pañcannaṃ