10. Paduṭṭhacittasuttavaṇṇanā

[20] Dasamassa kā uppatti? aṭṭhuppattiyeva. Ekadivasaṃ kira bhikkhū dhammasabhāyaṃ sannisinnā kathaṃ samuṭṭhāpesuṃ "āvuso idhekacco bahuṃ puññakammaṃ karoti, ekacco bahuṃ pāpakammaṃ, ekacco ubhayavomissakaṃ karoti, tattha vomissakārino kīdiso abhisamparāyo"ti. Atha satthā dhammasabhaṃ upagantvā paññattavarabuddhāsane nisinno taṃ kathaṃ sutvā "bhikkhave maraṇāsannakāle saṅkiliṭṭhacittassa duggati pāṭikaṅkhā"ti dassento imāya aṭṭhuppattiyā idaṃ suttaṃ desesi.

Tattha idhāti desāpadese nipāto. Svāyaṃ katthaci padesaṃ upādāya vuccati "idheva tiṭṭhamānassa, devabhūtassa me sato"tiādīsu. Katthaci sāsanaṃ upādāya "idheva bhikkhave samaṇo idha dutiyo samaṇo"tiādīsu. Katthaci