2. Mettasuttavaṇṇanā

[22] Dutiye mā bhikkhave puññānanti ettha māti paṭisedha nipāto. Puññasaddo "kusalānaṃ bhikkhave dhammānaṃ samādānahetu evamidaṃ puññaṃ pavaḍḍhatī"tiādīsu puññaphale āgato. "avijjāgato yaṃ bhikkhave purisapuggalo puññañca saṅkhāraṃ abhisaṅkharotī"tiādīsu kāmarūpāvacarasucarite. "puññūpagaṃ bhavati viññāṇan"tiādīsu sugativisesabhūte upapattibhave. "tīṇimāni bhikkhave puññakiriyāvatthūni dānamayaṃ puññakiriyāvatthu sīlamayaṃ puññakiriyāvatthu bhāvanāmayaṃ puññakiriyāvatthū"tiādīsu kusalacetanāyaṃ. Idha pana tebhūmakakusaladhamme veditabbo. Bhāyitthāti ettha duvidhaṃ bhayaṃ ñāṇabhayaṃ sārajjabhayanti. Tattha "yepi te bhikkhave devā dīghāyukā vaṇṇavanto sukhabahulā uccesu vimānesu ciraṭṭhitikā, tepi tathāgatassa

@3 saṃ.ni. 16/50/80 4 khu.iti. 25/60/278, aṅ.aṭṭhaka. 23/126/245 Dhammadesanaṃ sutvā yebhuyyena bhayaṃ santāsaṃ saṃvegaṃ santāsaṃ āpajjantī"tiādīsu āgataṃ ñāṇabhayaṃ. "ahudeva bhayaṃ, ahu lomahaṃso"tiādīsu āgataṃ sārajjabhayaṃ. Idhāpi sārajjabhayameva. Ayañcettha attho:- bhikkhave dīgharattaṃ kāyavacīsaṃyamo vattapaṭipattipūraṇaṃ ekāsanaṃ ekaseyyaṃ indriyadamo dhutadhammehi cittassa niggaho sati sampajaññaṃ kammaṭṭhānānuyogavasena vīriyārambhoti evamādīni yāni bhikkhunā nirantaraṃ pavattetabbāni puññāni, tehi mā bhāyittha, mā bhayaṃ santāsaṃ āpajjittha, ekaccassa diṭṭhadhammasukhassa uparodhabhayena samparāyikanibbānasukhadāyakehi puññehi mā bhāyitthāti. Nissake hi idaṃ sāmivacanaṃ.