8. Sahassavaggavaṇṇanā

1. Tambadāṭhikacoraghātakavatthu. (81)

"sahassamapi ce vācāti imaṃ dhammadesanaṃ satthā veḷuvane viharanto tambadāṭhikacoraghātakaṃ ārabbha kathesi.

Ekūnapañcasatā kira corā gāmaghātakādīni karontā jīvitaṃ kappesuṃ. Atheko puriso nibbiddhapiṅgalo tambadāṭhiko tesaṃ santikaṃ gantvā "ahaṃpi tumhehi saddhiṃ jīvissāmīti āha. Atha naṃ corajeṭṭhakassa dassetvā "ayaṃpi amhākaṃ santike vasituṃ icchatīti āhaṃsu. Atha naṃ corajeṭṭhako oloketvā "ayaṃ mātu thanaṃ chinditvā pitu vā galalohitaṃ nīharitvā khādanasamattho atikakkhaḷoti cintetvā "natthetassa amhākaṃ santike vasanakiccanti paṭikkhipi. So evaṃ paṭikkhittopi agantvā ekantasseva antevāsikaṃ upaṭṭhahanto ārādhesi. So taṃ ādāya corajeṭṭhakaṃ upasaṅkamitvā "sāmi bhaddako esa amhākaṃ upakārako, saṅgaṇhatha nanti yācitvā corajeṭṭhakaṃ paṭicchāpesi. Athekadivasaṃ nāgarā rājapurisehi saddhiṃ ekato hutvā te core gahetvā vinicchayāmaccānaṃ santikaṃ nayiṃsu. Amaccā tesaṃ pharasunā sīsacchedaṃ āṇāpesuṃ. Tato "ko nu kho ime māressatīti pariyesantā te māretuṃ icchantaṃ kañci adisvā Corajeṭṭhakaṃ āhaṃsu "tvaṃ ime māretvā jīvitañceva labhissasi sammānañca, mārehi neti. Sopi attānaṃ nissāya vasitattā māretuṃ na icchi. Etenupāyena ekūnapañcasate pucchiṃsu. Sabbepi na icchiṃsu. Sabbapacchā taṃ nibbiddhapiṅgalaṃ tambadāṭhikaṃ pucchiṃsu. So "sādhūti sampaṭicchitvā te sabbepi māretvā jīvitañceva sammānañca labhi. Etenupāyena nagarassa dakkhiṇadisatopi pañca corasatāni ānetvā amaccānaṃ dassetvā, tehi tesaṃ sīsacchede āṇatte, corajeṭṭhakaṃ ādiṃ katvā pucchantā kañci māretuṃ icchantaṃ adisvā "purimadivase eko puriso pañcasate core māresi, kahannu kho esoti, "asukaṭṭhāne amhehi diṭṭhoti vutte, taṃ pakkosāpetvā "ime mārehi, sammānaṃ lacchasīti āṇāpesuṃ. So "sādhūti sampaṭicchitvā tepi māretvā sammānaṃ labhi. Atha te "bhaddako ayaṃ puriso, nibaddhaṃ coraghātakamevetaṃ karissāmāti mantetvā tassa taṃ ṭhānantaraṃ datvā sammānaṃ kariṃsu. So pacchimadisatopi uttaradisatopi ānīte pañcasate pañcasate core ghātesiyeva. Evaṃ catūhi disāhi ānītāni dve sahassāni māretvā tato paṭṭhāya devasikaṃ "ekaṃ dveti ānītānīte manusse mārento pañcapaṇṇāsa saṃvaccharāni coraghātakakammaṃ akāsi. So mahallakakāle ekappahārena sīsaṃ chindituṃ na sakkoti, dve tayo vāre paharanto manusse kilameti. Nāgarā cintayiṃsu "aññopi coraghātako uppajjissati, ayaṃ ativiya manusse kilameti, kiṃ imināti, tassa taṃ ṭhānantaraṃ hariṃsu. So Pubbe coraghātakakammaṃ karonto "ahatasāṭake nivāsetuṃ navasappinā saṅkhataṃ khīrayāguṃ pātuṃ sumanapupphāni pilandhituṃ gandhehi vilimpitunti imāni cattāri na labhi. So ṭhānā cāvitadivase "khīrayāguṃ me pacathāti vatvā ahatavatthasumanamālāvilepanāni gāhāpetvā nadiṃ gantvā nahātvā ahatavatthāni nivāsetvā mālā pilandhitvā gandhehi anulittagatto gehaṃ āgantvā nisīdi. Athassa navasappisaṅkhatakhīrayāguṃ purato ṭhapetvā hatthadhovanodakaṃ āhariṃsu.