10. Dutiyarāgasuttavaṇṇanā

[69] Dasame atarīti tiṇṇo, na tiṇṇo atiṇṇo, samuddanti saṃsārasamuddaṃ, cakkhvāyatanādisamuddaṃ vā. Tadubhayampi duppūraṇaṭṭhena samuddo viyāti samuddaṃ. Atha vā samuddanaṭṭhena samuddaṃ, kilesavassanena sattasantānassa kilesa- sadanatoti attho. Savīcinti kodhūpāyāsavīcīhi savīciṃ. Vuttañhetaṃ "vīcibhayanti kho bhikkhu kodhūpāyāsassetaṃ adhivacanan"ti. Sāvaṭṭanti pañcakāmaguṇāvaṭṭehi saha āvaṭṭaṃ. Vuttampi cetaṃ "āvaṭṭabhayanti kho bhikkhu pañcannetaṃ kāmaguṇānaṃ adhivacanan"ti. Sagahaṃ sarakkhasanti attano gocaragatānaṃ anatthajananato caṇḍamakaramacchakacchaparakkhasasadisehi visabhāgapuggalehi sahitaṃ. Tathā cāha "sagahaṃ sarakkhasanti kho bhikkhu mātugāmassetaṃ adhivacanan"ti. Atarīti maggapaññānāvāya yathāvuttaṃ samuddaṃ uttari. Tiṇṇoti nittiṇṇo. Parāgatoti tassa samuddassa pāraṃ paratītaṃ nirodhaṃ upagato. Thale tiṭṭhatīti tato eva saṃsāramahoghaṃ kāmādimahoghañca atikkamitvā thale paratīre nibbāne bāhitapāpabrāhmaṇo tiṭṭhatīti vuccati.

Idhāpi gāthā sukkapakkhavaseneva āgatā. Tattha ūmibhayanti yathāvuttaūmibhayaṃ, bhāyitabbaṃ etasmāti taṃ ūmi bhayaṃ. Duttaranti duratikkamaṃ, accatārīti atikkami.