12. Attavaggavaṇṇanā

1. Bodhirājakumāravatthu. (127)

"attānañceti imaṃ dhammadesanaṃ satthā bhesakaḷāvane viharanto bodhirājakumāraṃ ārabbha kathesi.

So kira paṭhavītale aññehi pāsādehi asadisarūpaṃ ākāse uppatamānaṃ viya kokanadannāma pāsādaṃ kāretvā vaḍḍhakiṃ pucchi "kiṃ tayā aññatthāpi evarūpo pāsādo katapubbo, udāhu paṭhamasippameva te idanti. "paṭhamasippameva devāti vutte, so cintesi "sace ayaṃ aññassāpi evarūpaṃ pāsādaṃ karissati, ayaṃ pāsādo anacchariyo bhavissati; imaṃ mayā māretuṃ vā hatthapāde vāssa chindituṃ akkhīni vā uppātetuṃ vaṭṭati, evaṃ aññassa pāsādaṃ na karissatīti. So tamatthaṃ attano piyasahāyakassa sañjīvakaputtassa māṇavakassa kathesi. So cintesi "nissaṃsayaṃ esa vaḍḍhakiṃ nāsessati, anaggho sippiyo, mayi sante mā nassatu, saññamassa dassāmīti. So taṃ upasaṅkamitvā "pāsāde te kammaṃ niṭṭhitaṃ noti pucchitvā, "niṭṭhitanti vutte, "rājakumāro taṃ nāsetukāmo, tasmā attānaṃ rakkheyyāsīti āha. Vaḍḍhakī "bhaddakante sāmi kataṃ mama ārocentena, ahamettha kattabbaṃ Jānissāmīti vatvā, "kiṃ samma amhākaṃ pāsāde te kammaṃ niṭṭhitanti rājakumārena puṭṭho, "na tāva deva niṭṭhitaṃ, bahuṃ avasiṭṭhanti āha. "kiṃ kammaṃ nāma avasiṭṭhanti. "pacchā deva ācikkhissāmi, dārūni tāva āharāpethāti. "kiṃ dārūni nāmāti. "nissārāni sukkhadārūni devāti. So āharāpetvā adāsi. Atha naṃ āha "deva ito paṭṭhāya mama santikaṃ nāgantabbaṃ, sukhumakammaṃ karontassa hi aññena saddhiṃ sallāpe sati vikkhepo hoti, āhāravelāya pana me bhariyāva āhāraṃ āharissatīti. Rājakumāro "sādhūti paṭissuṇi. Sopi ekasmiṃ gabbhe nisīditvā tāni dārūni tacchetvā attano puttadārassa antonisīdanayoggaṃ garuḷasakuṇaṃ katvā āhāravelāya [pana] bhariyaṃ āha "gehe vijjamānakaṃ sabbaṃ vikkīṇitvā hiraññasuvaṇṇaṃ gaṇhāhīti. Rājakumāropi vaḍḍhakissa anikkhamanatthāya gehaṃ parikkhipāpetvā ārakkhaṃ ṭhapesi. Vaḍḍhakīpi sakuṇassa niṭṭhitakāle "ajja sabbepi dārake gahetvā āgaccheyyāsīti bhariyaṃ vatvā bhuttapātarāso puttadāraṃ sakuṇassa kucchiyaṃ nisīdāpetvā vātapānena nikkhamitvā palāyi. So tesaṃ "deva vaḍḍhakī palāyatīti kandantānaṃyeva gantvā himavante otaritvā ekaṃ nagaraṃ māpetvā tattha kaṭṭhavāhanarājā nāma jāto.