14. Buddhavaggavaṇṇanā

1. Māradhītāvatthu. (148)

"yassa jitanti imaṃ dhammadesanaṃ satthā bodhimaṇḍe viharanto māradhītaro ārabbha kathesi.

Desanaṃ pana sāvatthiyaṃ samuṭṭhāpetvā puna kururaṭṭhe māgandiya- brāhmaṇassa kathesi. Kururaṭṭhe kira māgandiyabrāhmaṇassa dhītā māgandiyāyeva nāma ahosi uttamarūpadhaRā. Taṃ paṭṭhayamānā anekabrāhmaṇamahāsālā ceva khattiyamahāsālā ca "dhītaraṃ no detūti māgandiyassa pahiṇiṃsu. Sopi "na tumhe mayhaṃ dhītu anucchavikāti sabbe paṭikkhipiyeva. Athekadivasaṃ satthā paccūsasamaye lokaṃ volokento attano ñāṇajālassa anto paviṭṭhaṃ māgandiya- brāhmaṇaṃ disvā "kiṃ nu kho bhavissatīti upadhārento brāhmaṇassa ca brāhmaṇiyā ca tiṇṇaṃ maggaphalānaṃ upanissayaṃ addasa. Brāhmaṇopi bahigāme nibaddhaṃ aggiṃ paricarati. Satthā pātova pattacīvaramādāya taṃ ṭhānaṃ agamāsi. Brāhmaṇo satthu rūpasiriṃ olokento "imasmiṃ loke iminā sadiso puriso nāma natthi, ayaṃ mayhaṃ dhītu anucchaviko, imassa dhītaraṃ dassāmīti cintetvā satthāraṃ āha "samaṇa mama ekā dhītā atthi, ahaṃ tassā Anucchavikaṃ purisaṃ apassanto taṃ na kassaci adāsiṃ, tvaṃ panassā anucchaviko, ahaṃ te dhītaraṃ pādaparicārikaṃ katvā dātukāmo; yāva naṃ ānemi, tāva idheva tiṭṭhāhīti. Satthā tassa kathaṃ sutvā neva abhinandi na paṭikkosi. Brāhmaṇopi gehaṃ gantvā brāhmaṇiṃ āha "bhoti ajja me dhītu anucchaviko puriso diṭṭho, tassa naṃ dassāmāti dhītaraṃ alaṅkārāpetvā ādāya brāhmaṇiyā saddhiṃ taṃ ṭhānaṃ agamāsi. Mahājanopi kutūhalajāto nikkhami. Satthā brāhmaṇena vuttaṭṭhāne aṭṭhatvā tattha padacetiyaṃ dassetvā aññasmiṃ ṭhāne aṭṭhāsi. Buddhānaṃ kira padacetiyaṃ "idaṃ asuko nāma passatūti adhiṭṭhahitvā akkantaṭṭhāneyeva paññāyati. Sesaṭṭhāne taṃ passanto nāma natthi. Brāhmaṇo attanā saddhiṃ gacchamānāya brāhmaṇiyā "kahaṃ soti puṭṭho "imasmiṃ ṭhāne tiṭṭhāhīti taṃ avacanti olokento padavalañjaṃ disvā "idamassa padanti dassesi. Sā lakkhaṇamantakusalatāya "na idaṃ brāhmaṇa kāmabhogino padanti vatvā, brāhmaṇena "bhoti tvaṃ udakacāṭimhi suṃsumāraṃ passasi, mayā so [samaṇo] `dhītaraṃ te dassāmīti vutto, tenāpi me adhivāsitanti vutte, "brāhmaṇa kiñcāpi tvaṃ evaṃ vadesi, idaṃ pana nikkilesasseva padanti vatvā imaṃ gāthamāha