12. Sampannasīlasuttavaṇṇanā

[111] Dvādasame sampannasīlāti ettha tividhaṃ sampannaṃ paripuṇṇasamaṅgīmadhuravasena. Tesu:-

"sampannaṃ sālikedāraṃ suvā bhuñjanti kosiya

paṭivedemi te brahme na ne vāretumussahe"ti ettha paripuṇṇattho sampannasaddo. "iminā pātimokkhasaṃvarena upeto hoti samupeto upagato samupagato sampanno samannāgato"ti ettha samaṅgibhāvattho sampannasaddo. "imissā bhante mahāpaṭhaviyā heṭṭhimatalaṃ sampannaṃ, seyyathāpi khuddamadhuṃ anīlakaṃ, evamassādan"ti ettha madhurattho sampannasaddo. Idha pana paripuṇṇatthepi samaṅgibhāvepi vaṭṭati, tasmā sampannasīlāti paripuṇṇasīlā hutvātipi, sīlasamaṅgino hutvātipi evamettha attho veditabbo.