10. Āḷavakasuttavaṇṇanā

evamme sutanti āḷavakasuttaṃ. Kā uppatti? atthavaṇṇanānayenevassa uppatti āvibhavissati. Atthavaṇṇanāya ca "evamme sutaṃ, ekaṃ samayaṃ bhagavā"ti etaṃ vuttatthameva. Āḷaviyaṃ viharati āḷavakassa yakkhassa bhavaneti ettha pana kā āḷavī, kasmā ca bhagavā tassa yakkhassa bhavane viharatīti? vuccate:- āḷavīti taṃ raṭṭhampi nagarampi vuccati, tadubhayampi idha vaṭṭati. Āḷavinagarassa hi samīpe viharantopi "āḷaviyaṃ viharatī"ti vuccati. Tassa ca nagarassa samīpe avidūre gāvutamatte taṃ bhavanaṃ, āḷaviraṭṭhe viharantopi "āḷaviyaṃ viharatī"ti vuccati, āḷaviraṭṭhe etaṃ bhavanaṃ.

Yasmā pana āḷavako rājā vividhanāṭakupabhogaṃ chaḍḍetvā corapaṭibāhanatthaṃ paṭirājanisedhanatthaṃ byāyāmakaraṇatthañca sattame sattame divase migavaṃ gacchanto ekadivasaṃ balakāyena saddhiṃ katikamakāsi "yassa passena migo palāyati, tasseva so bhāroti. Atha tasseva passena migo palāyati, javasampanno rājā dhanuṃ gahetvā pattikova tiyojanaṃ taṃ migaṃ anubandhi. Eṇimigā ca tiyojanavegā honti. Atha parikkhīṇajavaṃ taṃ migaṃ udakaṃ pavisitvā ṭhitaṃ vadhitvā dvidhā chetvā anatthikopi maṃsena "nāsakkhi migaṃ gahetun"ti aparādhamocanatthaṃ kājenādāya āgacchanto nagarassa avidūre bahalapattapalāsaṃ mahānigrodhaṃ disvā parissamavinodanatthaṃ tassa mūlaṃ upagato. Tasmiṃ ca nigrodhe āḷavako yakkho vessavaṇamahārājassa santikā varaṃ labhitvā majjhanhikasamaye tassa rukkhassa chāyāya phuṭṭhokāsaṃ paviṭṭhe pāṇino khādanto paṭivasati, so taṃ disvā khādituṃ