13. Sammāparibbājanīyasutta (mahāsamayasutta) vaṇṇanā

[362] Pucchāmi muniṃ pahūtapaññanti sammāparibbājanīyasuttaṃ, "mahāsamayasuttan"tipi vuccati mahāsamayadivase kathitattā. Kā uppatti? pucchāvasikā uppatti. Nimmitabuddhena hi puṭṭho bhagavā imaṃ suttamabhāsi, taṃ saddhiṃ pucchāya "sammāparibbājanīyasuttan"tipi vuccati. Ayamettha saṅkhepo, vitthārato pana sākiyakoliyānaṃ uppattito pabhuti porāṇehi vaṇṇīyati.

Tatrāyaṃ uddesamaggavaṇṇanā :- paṭhamakappikānaṃ pana rañño mahāsammatassa rojo nāma putto ahosi, rojassa vararojo, vararojassa

Tesaṃ parato tayo okkākavaṃsā ahesuṃ. Tesu tatiyaokkākassa pañca mahesiyo ahesuṃ, hatthā cittā jantu jālinī visākhāti. Ekekissā pañca pañca itthisatāni parivārā, sabbajeṭṭhāya cattāro puttā okkāmukho kākaṇḍo hatthiniko nipuroti, pañca dhītaro piyā suppiyā ānandā vijitā vijitasenāti. Evaṃ sā nava putte labhitvā kālamakāsi.