25. Bhikkhuvaggavaṇṇanā

1. Pañcabhikkhuvatthu. (252)

"cakkhunā saṃvaro sādhūti imaṃ dhammadesanaṃ satthā jetavane viharanto pañca bhikkhū ārabbha kathesi.

Tesu kira ekeko cakkhudvārādīsu pañcasu dvāresu ekekameva rakkhati. Athekadivasaṃ sannipatitvā "ahaṃ durakkhaṃ rakkhāmi, ahaṃ durakkhaṃ rakkhāmīti vivaditvā "satthāraṃ pucchitvā imamatthaṃ jānissāmāti satthāraṃ upasaṅkamitvā "bhante mayaṃ cakkhudvārādīni rakkhantā attano attano rakkhanadvārameva durakkhanti maññāma, ko nu kho amhesu durakkhaṃ rakkhatīti pucchiṃsu. Satthā ekaṃ bhikkhuṃpi anosādetvā "bhikkhave sabbānipetāni durakkhāneva; apica kho na tumhe idāneva pañcasu dvāresu asaṃvutā, pubbepi asaṃvutā; asaṃvutattāyeva ca paṇḍitānaṃ ovāde avattitvā jīvitakkhayaṃ pāpuṇitthāti vatvā "kadā bhanteti tehi yācito takkasilajātakassa vatthuṃ vitthāretvā rakkhasīnaṃ vasena rājakule jīvitakkhayaṃ patte pattābhisekena mahāsattena setacchattassa heṭṭhā rājāsane nisinnena attano sirisampattiṃ oloketvā "viriyaṃ nāmetaṃ sattehi kattabbamevāti vatvā udānavasena udānitaṃ