9. Sippasuttavaṇṇanā

[29] Navame ko nu kho sippaṃ jānātīti āvuso amhesu idha sannipatitesu ko nu jīvitanimittaṃ sikkhitabbaṭṭhena "sippan"ti laddhanāmaṃ yaṅkiñci Ājīvaṃ vijānāti. Ko kiṃ sippaṃ sikkhīti ko dīgharattaṃ sippācariyakulaṃ payirupāsitvā āgamato payogato ca hatthisippādīsu kiṃ sippaṃ sikkhi. Kataraṃ sippaṃ sippānaṃ agganti sabbasippānaṃ agārayhatāya mahapphalatāya akicchasiddhiyā ca kataraṃ sippaṃ aggaṃ uttamaṃ, yaṃ nissāya sukhena sakkā jīvitunti adhippāyo. Tatthekacceti tesu bhikkhūsu ekacce bhikkhū. Ye hatthācariyakulā pabbajitā, te. Evamāhaṃsūti te evaṃ bhaṇiṃsu. Ito parampi "ekacce"ti vuttaṭṭhāne eseva nayo. Hatthisippanti yaṃ hatthīnaṃ pariggaṇhaṇadamanasāraṇarogatikicchādibhedaṃ kattabbaṃ, taṃ uddissa pavattaṃ sabbampi sippaṃ idha "hatthisippan"ti adhippetaṃ. Assasippanti etthāpi eseva nayo. Rathasippaṃ pana rathayoggānaṃ damanasāraṇādividhānavasena ceva rathassa karaṇavasena ca veditabbaṃ. Dhanusippanti issāsasippaṃ, yo dhanubbedhoti vuccati. Tharusippanti sesaāvudhasippaṃ. Muddāsippanti hatthamuddāya gaṇanāsippaṃ. Gaṇanāsippanti acchiddakagaṇanāsippaṃ. Saṅkhānasippanti saṅkalanapaṭuppādanādivasena piṇḍagaṇanāsippaṃ. Taṃ yassa paguṇaṃ hoti, so rukkhampi disvā ettakāni ettha paṇṇānī"ti bhaṇituṃ jānāti. Lekhāsippanti nānākārehi akkharalikhanasippaṃ, lipiññāṇaṃ vā. Kāveyyasippanti attano cintāvasena vā parato paṭiladdhamutavasena vā, "imassa ayamattho, evaṃ naṃ yojessāmī"ti evaṃ attavasena vā, kiñcideva kabbaṃ disvā "tappaṭibhāgaṃ kabbaṃ karissāmī"ti ṭhānuppattikapaṭibhānavasena vā cintākaviādīnaṃ catunnaṃ kavīnaṃ kabbakaraṇasippaṃ. Vuttañhetaṃ bhagavatā:-

"cattārome bhikkhave kavī cintākavi sutakavi atthakavi paṭibhānakavī"ti.

Lokāyatasippanti "kāko seto aṭṭhīnaṃ setattā, balākā rattā lohitassa rattattā"ti evamādinayappavattaṃ paralokanibbānānaṃ paṭisedhakaṃ vitaṇḍasatthasippaṃ.