7. Tirokuḍḍasuttavaṇṇanā

nikkhepappayojanaṃ

idāni "tirokuḍḍesu tiṭṭhantī"tiādinā ratanasuttānantaraṃ nikkhittassa tirokuḍḍassa atthavaṇṇanākkamo anuppatto, tassa idha nikkhepappayojanaṃ vatvā atthavaṇṇanaṃ karissāma.

Tattha idaṃ hi tirokuḍḍaṃ iminānukkamena bhagavatā avuttampi yāyaṃ ito pubbe nānappakārena kusalakammapaṭipatti dassitā, tattha pamādaṃ āpajjamāno nirayatiracchānayonīhi kiliṭṭhatarepi ṭhāne uppajjamāno yasmā evarūpesu petesu uppajjati, tasmā na ettha pamādo karaṇīyoti dassanatthaṃ, yehi ca bhūtehi upaddutāya vesāliyā upaddavavūpasamanatthaṃ ratanasuttaṃ vuttaṃ, tesu ekaccāni evarūpānīti dassanatthaṃ vā vuttanti. Idamassa idha nikkhepappayojanaṃ veditabbaṃ.