Disato dvīsu disāsu jātaṃ. Okāsato paṭicchannakilomakaṃ hadayañca vakkañca paricchādetvā ṭhitaṃ appaṭicchannakilomakaṃ sakalasarīre cammassa heṭṭhato maṃsaṃ pariyonaddhitvā ṭhitanti.
Tattha yathā pilotikāya paliveṭhite maṃse pilotikā na jānāti "mayā maṃsaṃ paliveṭhitan"ti, napi maṃsaṃ jānāti "ahaṃ pilotikāya paliveṭhitan"ti, evameva na kilomakaṃ jānāti "mayā hadayavakkāni sakalasarīre cammassa heṭṭhato maṃsaṃ ca pariyonaddhitvāṭṭhitan"ti. napi hadayavakkāni sakalasarīre cammassa heṭṭhato ca maṃsaṃ jānāti "ahaṃ kilomakena paliveṭhitan"ti. Ābhogapaccavekkhaṇavirahitā hi ete dhammā .pe. Na puggaloti. Paricchedato heṭṭhā maṃsena upari cammena tiriyaṃ kilomakabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ kilomakaṃ vaṇṇādito vavatthapeti.
Tato paraṃ sarīrassa abbantare pihakaṃ vaṇṇato nīlamilātaniguṇḍipupphavaṇṇanti vavatthapeti. Saṇṭhānato yebhuyyena sattaṅgulappamāṇaṃ abandhanaṃ kāḷavacchakajivhāsaṇṭhānaṃ. Disato uparimāya disāya jātaṃ. Okāsato hadayassa vāmapasse udarapaṭalassa matthakapassaṃ nissāya ṭhitaṃ, yamhi paharaṇappahārena bahi nikkhante sattānaṃ jīvitakkhayo hotīti.
Tattha yathā koṭṭhakamatthakapassaṃ nissāya ṭhitā gomayapiṇḍi na jānāti "ahaṃ koṭṭhakamatthakapassaṃ nissāya ṭhitā"ti, napi koṭṭhakamatthakapassaṃ jānāti "gomayapiṇḍi maṃ nissāya ṭhitā"ti, evameva na pihakaṃ jānāti "ahaṃ udarapaṭalassa matthakapassaṃ nissāya ṭhitan"ti, napi udarapaṭalassa matthakapassaṃ jānāti "pihakaṃ maṃ nissāya ṭhitan"ti. Ābhogapaccavekkhaṇavirahitā hi ete dhammā .pe. Na puggaloti. Paricchedato pihakaṃ pihakabhāgena paricchinnanti vavatthapeti. ayametassa sabhāgaparicchedo, visabhāgaparicchedo pana kesasadiso evāti evaṃ pihakaṃ vaṇṇādito vavatthapeti.