Padavalañjaṃ na passāma devīti vutte, "rājā `tīṇi ratanāni uddissa nikkhantosmīti saccakiriyaṃ katvā gato bhavissati, ahaṃpi tīṇi ratanāni uddissa nikkhantā, tesameva ānubhāvena idaṃ udakaṃ udakaṃ viya mā ahosīti tiṇṇaṃ ratanānaṃ guṇaṃ anussaritvā rathasahassaṃ pesesi. Udakaṃ piṭṭhipāsāṇasadisaṃ ahosi. Cakkānaṃ akkhagganemivaṭṭiyo neva temiṃsu. Eteneva upāyena itarāpi dve nadiyo uttari.

Satthā tassā āgamanabhāvaṃ ñatvā, yathā attano santike nisinnā bhikkhū na paññāyanti; evamakāsi. Sāpi gacchantī gacchantī satthu sarīrato nikkhantarasmiyo disvā tatheva cintetvā satthāraṃ upasaṅkamitvā vanditvā ekamantaṃ ṭhitā pucchi "bhante mahākappino tumhe uddissa nikkhanto, āgatettha maññe, kahaṃ so, amhākaṃpi naṃ dassethāti. "nisīdatha tāva, idheva taṃ passissathāti. Tā sabbāpi tuṭṭhacittā "idheva kira nisinnā sāmike passissāmāti nisīdiṃsu. Satthā anupubbīkathaṃ kathesi. Anojā devī desanāvasāne saparivārā sotāpattiphalaṃ pāpuṇi. Mahākappinatthero tāsaṃ vaḍḍhitaṃ dhammadesanaṃ suṇanto saparivāro saha paṭisambhidāhi arahattaṃ pāpuṇi. Tasmiṃ khaṇe satthā tāsaṃ te bhikkhū arahattaṃ patte dassesi. Tāsaṃ kira āgatakkhaṇeyeva attano sāmike kāsāvadhare muṇḍasire disvā cittaṃ ekaggaṃ na bhaveyya, tena maggaphalāni pattuṃ na sakkuṇeyyuṃ; tasmā acalassaddhāya patiṭṭhitakāle tāsaṃ te bhikkhū arahattaṃ patte dassesi. Tāpi te disvā pañcappatiṭṭhitena vanditvā "bhante Tumhākaṃ tāva pabbajitakiccaṃ matthakaṃ pattanti vatvā satthāraṃ vanditvā ekamantaṃ ṭhitā pabbajjaṃ yāciṃsu. "evaṃ kira vutte, satthā uppalavaṇṇāya āgamanaṃ cintesīti ekacce vadanti. Satthā pana tā upāsikāyo āha "sāvatthiṃ gantvā bhikkhunūpassaye pabbajathāti. Tā anupubbena cārikañcaramānā antarāmagge mahājanena abhihaṭasakkārasammānā padasāva vīsatiyojanasatikaṃ maggaṃ gantvā bhikkhunūpassaye pabbajitvā arahattaṃ pāpuṇiṃsu. Satthāpi bhikkhusahassaṃ ādāya ākāseneva jetavanaṃ agamāsi.