@3 cha.Ma. maṃsaṃ paliveṭhitanti 4 cha.Ma. nīlaṃ milātanigguṇḍī...

Tato paraṃ sarīrassa abbhantare dvattiṃsamaṃsakhaṇḍappabhedampi papphāsaṃ vaṇṇato rattaparipakkaudumbaravaṇṇanti vavatthapeti. Saṇṭhānato visamacchinnapūvakhaṇḍa- saṇṭhānaṃ. Chadaniṭṭhakakhaṇḍapuñjasaṇṭhānantipi eke. Tadetaṃ abbhantare asitapītādīnaṃ abhāve uggatena kammajatejusminā abbhāhatattā saṅkhāditapalālapiṇḍamiva nirasaṃ nirojaṃ hoti. Disato uparimāya disāya jātaṃ. Okāsato sarīrabbhantare dvinnaṃ thanānaṃ abbhantare hadayañca yakanañca uparicchādetvā olambantaṃ ṭhitanti.

Tattha yathā jiṇṇakoṭṭhabbhantare lambamāno sakuṇakulāvako na jānāti "ahaṃ jiṇṇakoṭṭhabbhantare lambamāno ṭhito"ti, napi jiṇṇakoṭṭhabbhantaraṃ jānāti "sakuṇakulāvako mayi lambamāno ṭhito"ti, evameva na papphāsaṃ jānāti "ahaṃ sarīrabbhantare dvinnaṃ thanānaṃ abbhantare lambamānaṃ ṭhitan"ti, napi sarīrabbhantare dvinnaṃ thanānaṃ abbhantaraṃ jānāti "mayi papphāsaṃ lambamānaṃ ṭhitan"ti. Ābhogapaccavekkhaṇavirahitā hi ete dhammā .pe. Na puggaloti. Paricchedato papphāsaṃ papphāsabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ papphāsaṃ vaṇṇādito vavatthapeti.