Athassa guṇatejena sakkassa āsanaṃ uṇhākāraṃ dassesi. So "kinnu kho kāraṇanti upadhārento "paṇḍitasāmaṇero upajjhāyassa pattacīvaraṃ datvā `samaṇadhammaṃ karissāmīti nivatto, mayāpi tattha gantuṃ vaṭṭatīti cintetvā, cattāro mahārāje āmantetvā "vihārassa upavane vicarante sakuṇe palāpetvā samantā ārakkhaṃ gaṇhathāti vatvā, candadevaputtaṃ "candamaṇḍalaṃ ākaḍḍhitvā gaṇhāhīti, suriyadevaputtaṃ "suriyamaṇḍalaṃ ākaḍḍhitvā gaṇhāhīti vatvā, sayaṃ gantvā āviñjanarajjuṭṭhāne ārakkhaṃ gahetvā aṭṭhāsi. Vihāre purāṇapaṇṇassāpi saddo nāhosi. Sāmaṇerassa cittaṃ ekaggaṃ ahosi. So antarābhatteyeva attabhāvaṃ sammasitvā tīṇi phalāni pāpuṇi. Theropi "sāmaṇero vihāre nisinno, tassa upakappanakaṃ bhojanaṃ asukakule nāma sakkā laddhunti ekaṃ pemagāravayuttaṃ upaṭṭhākakulaṃ agamāsi. Tattha ca manussā taṃ divasaṃ rohitamacche labhitvā therasseva āgamanaṃ olokentā nisīdiṃsu. Te theraṃ āgacchantaṃ disvā "bhante bhaddakaṃ vo kataṃ idhāgacchantehīti anto pavesetvā Yāgukhajjakādīni datvā rohitamaccharasena piṇḍapātaṃ adaṃsu. Thero haraṇākāraṃ dassesi. Manussā "paribhuñjatha bhante, haraṇakabhattaṃpi labhissathāti vatvā therassa bhattakiccāvasāne pattaṃ rohitamaccharasabhojanassa pūretvā adaṃsu. Thero "sāmaṇero me chātoti sīghaṃ agamāsi. Satthāpi taṃ divasaṃ sakālasseva bhuñjitvā vihāraṃ gantvā "paṇḍitasāmaṇero upajjhāyassa pattacīvaraṃ datvā `samaṇadhammaṃ karissāmīti nivatto; nippajjissati nu kho assa pabbajitakiccanti upadhārento tiṇṇaṃ phalānaṃ pattabhāvaṃ ñatvā "arahattassa upanissayo atthi natthīti āvajjento "atthīti disvā "purebhattameva arahattaṃ pattuṃ sakkhissati na sakkhissatīti upadhārento "sakkhissatīti aññāsi. Athassa etadahosi "sārīputto sāmaṇerassa bhattamādāya sīghamāgacchati, antarāyaṃpissa kareyya, dvārakoṭṭhake ārakkhaṃ gahetvā nisīdissāmi, atha naṃ cattāro pañhe pucchissāmi, tasmiṃ vissajjamāne sāmaṇero saha paṭisambhidāhi arahattaṃ pāpuṇissatīti tato gantvā dvārakoṭṭhake ṭhatvā sampattaṃ theraṃ cattāro pañhe pucchi. Puṭṭhapañhe thero vissajjesi.