Tato paraṃ antosarīrabbhantare antaguṇaṃ vaṇṇato setaṃ dakasītalikamūlavaṇṇanti vavatthapeti. Saṇṭhānato dakasītalikamūlasaṇṭhānamevāti, gomuttasaṇṭhānantipi eke. Disato dvīsu disāsu jātaṃ. Okāsato kuddālapharasukammādīni karontānaṃ yantākaḍḍhanakāle yantasuttakamiva yantaphalakāni antabhoge ekato aggaḷante ābandhitvā pādapuñjanarajjumaṇḍalakassa antarā taṃ saṃsibbitvā ṭhitarajjukā viya ekavīsatiyā antabhogānaṃ antare ṭhitanti.

Tattha yathā pādapuñjanarajjumaṇḍalakaṃ saṃsibbitvā ṭhitarajjukā na jānāti "mayā pādapuñjanarajjumaṇḍalakaṃ saṃsibbitvā ṭhitan"ti, napi pādapuñjana- rajjumaṇḍalakaṃ jānāti "rajjukā maṃ saṃsibbitvā ṭhitā"ti, evameva na antaguṇaṃ jānāti "ahaṃ antaṃ ekavīsatibhogabbhantare ābandhitvā ṭhitan"ti, napi antaṃ jānāti "antaguṇaṃ maṃ ābandhitvā ṭhitan"ti. Ābhogapaccavekkhaṇavirahitā hi ete dhammā .pe. Na puggaloti. Paricchedato antaguṇaṃ antaguṇabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ antaguṇaṃ vaṇṇādito vavatthapeti.

Tato paraṃ antosarīre udariyaṃ vaṇṇato ajjhohaṭāhāravaṇṇanti vavatthapeti. Saṇṭhānato parissāvane sithilabandhataṇḍulasaṇṭhānaṃ. Disato uparimāya disāya ṭhitaṃ okāsato udare ṭhitanti. Udarannāma ubhato nippīḷiyamānassa allasāṭakassa majjhe sañjātapoṭakasadisaṃ antapaṭalaṃ, bahi maṭṭhaṃ, anto maṃsakasambupaliveṭhitakiliṭṭhapāvārapupphasadisaṃ, kuṭṭhitapanasaphalassa abbhantarasadisantipi eke. Yattha takkoṭakā gaṇḍuppādakā tālahīrakā sūcimukhakā paṭatantū suttakā iccevamādidvattiṃsakulappabhedā kimiyo ākulabyākulasaṇḍacārino hutvā nivasanti,