@4 cha.Ma., i....phoṭakasadisaṃ 5 cha.Ma. kuthitapanasaphalassa

@6 cha.Ma. tattha takkolakā... i. tattha... 7 cha.Ma., i. kimayo Ye vā pānabhojanādimhi avijjamāne ullaṅghitvā viravantā hadayamaṃsaṃ abhihananti pānabhojanādiajjhoharaṇavelāya uddhaṃmukhā hutvā paṭhamajjhohaṭe dve tayo ālope turitaturitā vilumpanti, yaṃ etesaṃ kimīnaṃ pasūtigharaṃ vaccakuṭi gilānasālā susānañca hoti, yattha seyyathāpi nāma caṇḍālagāmadvāre candanikāya saradasamaye thūlaphussitake deve vassante udakena vuyhaṃ muttakarīsacammaṭṭhinhārūkhaṇḍakheḷasiṃghānikālohitappabhuti nānākuṇapajātaṃ nipatitvā kaddamodakāluḷitaṃ sañjātakimikulākulaṃ hutvā dvihatīhaccayena suriyātapasantāpavegakuṭṭhitaṃ uparūpari pheṇapubbuḷake muñcantaṃ abhinīlavaṇṇaṃ paramaduggandhaṃ jegucchaṃ upagantuṃ vā daṭṭhuṃ vā anaraharūpataṃ āpajjitvā tiṭṭhati, pageva ghāyituṃ vā sāyituṃ vā, evameva nānappakāraṃ pānabhojanādi dantamusalasañcuṇṇitaṃ jivhāhatthasamparivattitaṃ kheḷalālapalibuddhaṃ taṃ khaṇaṃ vigatavaṇṇa- gandharasādisampadaṃ koliyakule suvāṇavamathusadisaṃ nipatitvā pittasemhāvātapaliveṭhitaṃ hutvā udaraggisantāpavegukuṭṭhitaṃ kimikulākulaṃ uparūpari pheṇupubbuḷakāni muñcantaṃ paramakasambukaduggandhajegucchabhāvamāpajjitvā tiṭṭhati. Yaṃ sutvāpi pānabhojanādīsu ananuññatā saṇṭhāti, pageva paññācakkhumā oloketvā. Yattha ca patitaṃ pānabhojanādi pañcadhā vivekaṃ gacchati, ekaṃ bhāgaṃ pāṇakā khādanti, ekabhāgaṃ udaraggi jhāpeti, eko bhāgo muttaṃ hoti, eko bhāgo karīsaṃ hoti, eko bhāgo rasabhāvaṃ āpajjitvā lohitamaṃsādīni upabrūhayatīti.

Tattha yathā paramajegucchāya suvāṇadoṇiyā ṭhito suvāṇavamathu na jānāti "ahaṃ suvāṇadoṇiyā ṭhito"ti, napi suvāṇadoṇi jānāti "mayi suvāṇavamathu ṭhito"ti evameva na udariyaṃ jānāti "ahaṃ imasmiṃ paramaduggandhajegucche udare ṭhitan"ti. Napi udaraṃ jānāti "mayi udariyaṃ ṭhitan"ti. Ābhogapaccavekkhaṇavirahitā hi ete dhammā .pe. Na puggaloti. Paricchedato udariyaṃ udariyabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ udariyaṃ vaṇṇādito vavatthapeti.