Kathitaniyāmeneva sabbaṃ ārocesuṃ. Taṃ sutvā satthā "[1]- bhikkhave tumhe kassapaṃ `kulesu ceva paccayesu ca laggoti vadetha, so `mama vacanaṃ karissāmīti nivatto, eso hi pubbepi patthanaṃ karontoyeva `catūsu paccayesu alaggo candopamo hutvā kulāni upasaṅkamituṃ samattho bhaveyyanti patthanaṃ akāsi, natthetassa kulesu vā paccayesu vā saṅgo; ahaṃ candopamappaṭipadañceva ariyavaṃsappaṭipadañca kathento kassapaṃ ādiṃ katvā kathesinti. Bhikkhū satthāraṃ pucchiṃsu "bhante kadā pana therena patthanā ṭhapitāti. "sotukāmattha bhikkhaveti. "āma bhanteti. Satthā tesaṃ "bhikkhave ito satasahassakappamatthake padumuttaro nāma buddho loke udapādīti vatvā padumuttarabuddhakāle tena ṭhapitaṃ patthanaṃ ādiṃ katvā sabbaṃ therassa pubbacaritaṃ kathesi. Taṃ therapāliyaṃ vitthāritameva. Satthā pana imaṃ therassa pubbacaritaṃ vitthāretvā "iti kho bhikkhave ahaṃ candopamappaṭipadañceva ariyavaṃsappaṭipadañca mama puttaṃ kassapaṃ ādiṃ katvā kathesiṃ, mama puttassa paccayesu vā kulesu vā vihāresu vā pariveṇesu vā saṅgo nāma natthi, pallale otaritvā tattha caritvā gacchanto rājahaṃso viya katthaci alaggoyeva mama puttoti anusandhiṃ ghaṭetvā dhammaṃ desento imaṃ gāthamāha

"uyyuñjanti satīmanto, na nikete ramanti te;

haṃsāva pallalaṃ hitvā okamokaṃ jahanti teti.