suññato animitto ca vimokkho yesa gocaro,

ākāseva sakuntānaṃ gati tesaṃ duranvayāti.

Tattha "sannicayoti: dve sannicayā: kammasannicayo ca paccayasannicayo ca; tesu kusalākusalakammaṃ kammasannicayo nāma, cattāro paccayā paccayasannicayo nāma. Tattha vihāre vasantassa bhikkhuno ekaṃ guḷapiṇḍakaṃ catubbhāgamattaṃ sappiṃ ekañca taṇḍulanāḷiṃ ṭhapentassa paccayasannicayo natthi, tato uttariṃ hoti: yesaṃ ayaṃ duvidho sannicayo natthi. Pariññātabhojanāti: tīhi pariññāhi pariññātabhojanā, yāguādīnaṃ hi yāgubhāvādijānanaṃ ñātapariññā, āhāre paṭikūlasaññāvasena pana bhojanassa parijānanaṃ tīraṇapariññā, kavaḷiṅkārāhāre chandarāgāpakaḍḍhanañāṇaṃ pahānapariññā; imāhi tīhi pariññāhi ye pariññātabhojanā. Suññato animitto cāti: Ettha appaṇihitavimokkhopi gahitoyeva. Tīṇipi hetāni nibbānasseva nāmāni: nibbānaṃ hi rāgadosamohānaṃ abhāvena suññaṃ tehi ca vimuttanti suññato vimokkho, taṃ rāgādinimittānaṃ abhāvena animittaṃ tehi ca vimuttanti animitto vimokkho, rāgādippaṇidhīnaṃ pana abhāvena appaṇihitaṃ tehi ca vimuttanti appaṇihito vimokkhoti vuccati. Phalasamāpattivasena taṃ ārammaṇaṃ katvā viharantānaṃ ayaṃ tividho vimokkho yesaṃ gocaro. Gati tesaṃ duranvayāti: yathā nāma ākāsena gatānaṃ sakuṇānaṃ padanikkhepassa adassanena gati duranvayā na sakkā ñātuṃ; evameva yesaṃ ayaṃ duvidho sannicayo natthi, imāhi ca tīhi pariññāhi pariññātabhojanā, yesañca ayaṃ vuttappakāro vimokkho gocaro, tesaṃ "tayo bhavā catasso yoniyo pañca gatiyo satta viññāṇaṭṭhitiyo nava sattāvāsāti imesu pañcasu koṭṭhāsesu iminā nāma gatāti gamanassa appaññāyanato gati duranvayā na sakkā paññāpetunti.

Desanāvasāne bahū sotāpattiphalādīni pāpuṇiṃsūti.