Ekasmiṃ hi divase thero jiṇṇacīvaro saṅkārakūṭādīsu cīvaraṃ pariyesati. Tassa ito tatiye attabhāve purāṇadutiyikā tāvatiṃsabhavane nibbattitvā jālinī nāma devadhītā ahosi. Sā theraṃ colakāni pariyesamānaṃ disvā terasahatthāyāmāni catuhatthavitthārāni tīṇi dibbadussāni gahetvā "sacāhaṃ iminā nīhārena dassāmi, thero na gaṇhissatīti cintetvā tassa colakāni pariyesamānassa purato ekasmiṃ saṅkārakūṭe, yathā nesaṃ dasantamattameva paññāyati, tathā ṭhapesi. Thero tena maggena colakapariyesanaṃ caranto tesaṃ dasantaṃ disvā tattheva gahetvā ākaḍḍhamāno vuttappamāṇāni dibbadussāni disvā "ukkaṭṭhapaṃsukūlaṃ vata idanti ādāya pakkāmi. Athassa cīvarakāradivase satthā pañcasatabhikkhuparivāro vihāraṃ gantvā nisīdi. Asītimahātherāpi tatheva nisīdiṃsu. Cīvaraṃ sibbetuṃ mahākassapatthero mūle nisīdi, sārīputtatthero majjhe, ānandatthero agge. Bhikkhusaṅgho suttaṃ vaṭṭesi. Taṃ satthā sūcipāsake āvuṇi. Mahāmoggallānatthero, yena yenattho, taṃ taṃ upanento vicari. Devadhītāpi antogāmaṃ pavisitvā "bhonto ayyassa no anuruddhattherassa cīvaraṃ karonto satthā ajja asītimahāsāvakaparivuto pañcahi bhikkhusatehi Saddhiṃ vihāre nisīdi, yāguādīni ādāya vihāraṃ gacchathāti bhikkhaṃ samādapesi. Mahāmoggallānattheropi antarābhatte mahājambupesiṃ āhari. Pañcasatā bhikkhū parikkhīṇaṃ khādituṃ nāsakkhiṃsu. sakko cīvarakaraṇaṭṭhāne paribhaṇḍamakāsi. Bhūmi alattakarasarañjitā viya ahosi. Bhikkhūhi paribhuttāvasesānaṃ yāgukhajjakabhattānaṃ mahārāsi ahosi. Bhikkhū ujjhāyiṃsu "ettakānaṃ bhikkhūnaṃ kiṃ evaṃbahukehi yāguādīhi, nanu nāma pamāṇaṃ sallakkhetvā `ettakannāma āharathāti ñātakā ca upaṭṭhākā ca vattabbā siyuṃ, anuruddhatthero attano ñātiupaṭṭhākānaṃ bahubhāvaṃ ñāpetukāmo maññeti. Atha ne satthā "kiṃ bhikkhave kathethāti pucchitvā, "bhante idannāmāti vutte, "kiṃ pana tumhe bhikkhave `idaṃ anuruddhena āharāpitanti maññathāti. "āma bhanteti. "na bhikkhave mama putto anuruddho evarūpaṃ vadeti, na hi khīṇāsavā paccayapaṭisaṃyuttaṃ kathaṃ kathenti, ayaṃ pana piṇḍapāto devatānubhāvena nibbattoti anusandhiṃ ghaṭetvā dhammaṃ desento imaṃ gāthamāha