Avassayo hohīti añjaliṃ paggayha sattavassikadārakassa pādamūle ukkuṭikaṃ nisīdi. Atha naṃ sāmaṇero āha "nāhaṃ bhante etadatthāya kathesiṃ, tumhākaṃ cittaṃ anurakkhantena mayā evaṃ vuttaṃ, na ettha tumhākaṃ doso atthi, na mayhaṃ, vaṭṭasseveso doso, mā cintayittha, mayā tumhākaṃ vippaṭisāraṃ rakkhanteneva nārocitanti. Thero sāmaṇerena assāsiyamānopi anassāsitvā uppannasaṃvego sāmaṇerassa bhaṇḍaṃ gahetvā satthu santikaṃ pāyāsi. Satthāpissa āgamanaṃ olokentova nisīdi. So gantvā satthāraṃ vanditvā satthārā saddhiṃ paṭisammodanaṃ katvā "khamanīyaṃ te bhikkhu, na kiñci atirekaṃ aphāsukaṃ atthīti pucchito āha "khamanīyaṃ bhante, natthi me kiñci atirekaṃ aphāsukaṃ; apica kho pana me ayaṃ daharasāmaṇero viya añño atirekaguṇo na diṭṭhapubboti. "kiṃ pana iminā kataṃ bhikkhūti. So ādito paṭṭhāya sabbantaṃ pavattiṃ bhagavato ārocetvā āha "evaṃ bhante mayā khamāpiyamāno maṃ evaṃ vadesi `nevettha tumhākaṃ doso atthi, na mayhaṃ, vaṭṭasseveso doso, tumhe mā cintayitthāti, iti maṃ assāsesiyeva, mayi neva kopaṃ na dosamakāsi; na me bhante evarūpo guṇasampanno diṭṭhapubboti. Atha naṃ satthā "bhikkhu khīṇāsavā nāma na kassaci kuppanti na dussanti, santindriyā santamānasāva hontīti vatvā anusandhiṃ ghaṭetvā dhammaṃ desento imaṃ gāthamāha

"santantassa manaṃ hoti santā vācā ca kamma ca

sammadaññā vimuttassa upasantassa tādinoti.