Āyasmā hi sārīputto sattāsītikoṭidhanaṃ pahāya pabbajitvā "cālā, upacālā, sīsupacālāti tisso bhaginiyo "cundo, upasenoti ime dve bhātaro pabbājesi. Revatakumāro ekova gehe avasiṭṭho. Athassa mātā cintesi "mama putto upatisso ettakaṃ dhanaṃ pahāya pabbajitvā tisso bhaginiyo dve ca bhātaro pabbājesi, revato ekova avasiṭṭho; sace imaṃpi pabbājessati, ettakaṃ no dhanaṃ nassissati, kulavaṃso pacchijjissati; Daharakāleyeva naṃ gharāvāsena bandhissāmīti. Sārīputtattheropi paṭikacceva bhikkhū āṇāpesi "sace āvuso revato pabbajitukāmo āgacchati, āgatamattameva naṃ pabbājeyyātha; mama mātāpitaro micchādiṭṭhikā, kintehi āpucchitehi, ahameva tassa mātā ca pitā cāti. Mātāpissa revatakumāraṃ sattavassikameva gharabandhanena bandhitukāmā samajātike kule kumārikaṃ vāretvā divasaṃ vavatthapetvā kumāraṃ maṇḍetvā pasādhetvā mahatā parivārena saddhiṃ ādāya kumārikāya ñātigharaṃ agamāsi. Atha nesaṃ katamaṅgalānaṃ dvinnaṃpi ñātakesu sannipatitesu, udakapātiyaṃ hatthe otāretvā maṅgalāni vatvā kumārikāya vuḍḍhiṃ ākaṅkhamānā ñātakā "tava ayyikāya diṭṭhadhammaṃ passa, ayyikā viya ciraṃ jīva ammāti āhaṃsu. Revatakumāro "ko nu kho imissā ayyikāya diṭṭhadhammoti cintetvā "katarā imissā ayyikāti pucchi. Atha naṃ āhaṃsu "tāta kiṃ na passasi imaṃ vīsavassasatikaṃ khaṇḍadantaṃ palitakesaṃ valitatacaṃ tilakāhatagattaṃ gopānasivaṅkaṃ, esā etissā ayyikāti. "kiṃ pana ayaṃpi evarūpā bhavissatīti. "sace jīvissati, bhavissati tātāti. So cintesi "evarūpaṃpi nāma sarīraṃ jarāya imaṃ vippakāraṃ pāpuṇissati, idaṃ me bhātarā upatissena diṭṭhaṃ bhavissati, ajjeva mayā palāyitvā pabbajituṃ vaṭṭatīti. Atha naṃ ñātakā kumārikāya saddhiṃ ekayānaṃ āropetvā ādāya pakkamiṃsu. So thokaṃ gantvā sarīrakiccaṃ apadisitvā "ṭhapetha tāva Yānaṃ, otaritvā āgamissāmīti yānā otaritvā ekasmiṃ gumbe thokaṃ papañcaṃ katvā agamāsi. Punapi thokaṃ gantvā teneva apadesena otaritvā abhiruhitvā punapi tatheva akāsi. Athassa ñātakā "addhā imassa uṭṭhānāni vattantīti sallakkhetvā nātidaḷhaṃ ārakkhaṃ kariṃsu. So punapi thokaṃ gantvā teneva apadesena otaritvā "tumhe pājentā purato gacchatha, mayaṃ pacchato saṇikaṃ āgamissāmāti vatvā otaritvā gumbābhimukho ahosi. Ñātakāpissa "pacchato āgamissatīti saññāya yānaṃ pājentā agamaṃsu. Sopi tato palāyitvā, ekasmiṃ padese tiṃsamattā bhikkhū vasanti, tesaṃ santikaṃ gantvā vanditvā āha "pabbājetha maṃ bhanteti. "āvuso tvaṃ sabbālaṅkārappaṭimaṇḍito, mayaṃ te rāputtabhāvaṃ vā amaccaputtabhāvaṃ vā na jānāma, kathaṃ taṃ pabbājessāmāti. "tumhe maṃ bhante na jānāthāti. "na jānāmāvusoti. "ahaṃ upatissassa kaniṭṭhabhātikoti. "ko esa upatisso nāmāti. "bhante bhadantā mama bhātaraṃ `sārīputtoti vadanti, tasmā `upatissoti vutte, na jānantīti. "kiṃ pana sārīputtattherassa kaniṭṭhabhātikoti. "āma bhanteti. "tenahi ehi, bhātarā te anuññātamevāti vatvā tassa ābharaṇāni omuñcāpetvā ekamante ṭhapāpetvā taṃ pabbājetvā therassa sāsanaṃ pahiṇiṃsu. Thero taṃ sutvā bhagavato ārocesi "bhante `āraññakabhikkhūhi kira revato pabbājitoti sāsanaṃ pahiṇiṃsu, Gantvā taṃ passitvā āgamissāmīti. Satthā "adhivāsehi tāva sārīputtāti gantuṃ nādāsi. Thero puna katipāhaccayena satthāraṃ āpucchi. Satthā "adhivāsehi tāva sārīputta, mayaṃpi gamissāmāti neva gantuṃ adāsi.