Tattha "araññānīti: supupphitataruṇavanasaṇḍamaṇḍitāni vimalasalilasampannāni araññāni nāma ramaṇīyāni. Yatthāti: yesu araññesu vikasitesu viya padumavanesu gāmamakkhikā kāmagavesako jano na ramati. Vītarāgāti: vītarāgā pana khīṇāsavā bhamaramadhukarā viya padumavanesu tathārūpesu araññesu ramissanti. Kiṃkāraṇā? Na te kāmagavesinoti: yasmā te kāmagavesino na hontīti attho.

Desanāvasāne so thero yathānisinnova saha paṭisambhidāhi arahattaṃ patvā ākāsenāgantvā thutiṃ karonto tathāgatassa pāde vanditvā agamāsīti.

Aññataritthīvatthu.

Arahantavaggavaṇṇanā niṭṭhitā.